रामेछाप हुँदै ओखलढुंगा जाँदै गरेको बस धुलिखेलमा पल्टियो, १७ जना घाइते

काठमाडौं । काठमाडौंबाट रामेछाप जाँदै गरेको बस बीपी राजमार्गअन्तर्गतको धुलिखेल खण्डमा दुर्घटना हुँदा १७ जना घाइते भएका छन् । धुलिखेल नगरपालिका– १० सारादा बतासेमा  बागमती प्रदेश–३–०१–००५ ख ९९४२ नम्बरको बस आज बिहान ८ ः २० बजेको समयमा अनियन्त्रित भई सडकको नालीमा पल्टिएर दुर्घटना भएको हो ।

दुर्घटनामा बसमा सवार २४ जनामध्ये बस चालक र सह–चालकसहित १७ जना घाइते भएको अस्थायी ट्राफिक प्रहरी पोस्ट काभ्रेभञ्ज्याङका सहायक हवलदार रुद्र लामिछानेले जानकारी दिए । 

घाइतेहरूलाई उपचारका लागि धुलिखेल अस्पतालमा पठाइएको छ । 

सो बस रामेछापको धोबी, ढाँडे हुँदै ओखलढुंगाको पोकली लागि गुडेको प्रहरीले जनाएको छ ।

बस घटनास्थलमै रहेकोले बाटो एकतर्फी मात्र सञ्चालनमा आएको प्रहरीले जानकारी दिएको छ ।