नवलपुरको कावासोतीमा दुईवटा ट्रक ठोक्किँदा एकको मृत्यु, दुई गम्भीर

नवलपरासी । नवलपुरको कावासोतीमा दुईवटा ट्रक एकआपसमा ठोक्किँदा एक जनाको मृत्यु भएको छ । 

आइतवार बिहान करिब २ बजेतिर पूर्वपश्चिम राजमार्ग अन्तर्गत नवलपुरको कावासोतीको खरकट्टा जंगलमा ना ७ ख १०९९ र ना ६ ख ११९४ नम्बरको ट्रक एकआपसमा ठोक्किएको हो । 

घटनामा अन्य दुई जना गम्भीर घाइते समेत भएका छन् । 

मृत्यु हुने दाङ घर भएका अनराम राखल छन् । उनको घटनास्थलमै मृत्यु भएको हो ।

त्यस्तै दुर्घटनामा दाङकै सुदिप राई र विनोद लामा गम्भीर घाइते भएका छन् । उनीहरुलाई उपचारका लागि चितवनको भरतपुर पठाइएको छ भने राखलको शवलाई पोस्टमार्टमका लागि दुम्कौली स्वास्थ्य केन्द्र देवचुलीमा पठाइएको नवलपुर प्रहरीले जनाएको छ ।