काठमाडौं । चितवनबाट अपहरणमा परेका १६ वर्षीय किशोर रिशव गुप्ताको काठमाडौंबाट सकुशल उद्धार गरिएको छ ।
मंगलबार काठमाडौं उपत्यका अपराध अनुसन्धान कार्यालयको टोलीले अपहरणमा परेका रिशवको उद्धार गरेको हो ।
अपहरणमा संलग्न ५ जना भारतीयहरुलाई समेत पक्राउ गरिएका काठमाडौं उपत्यका अपराध अनुसन्धान कार्यालयका प्रवक्ता एसपी शरदकुमार थापा क्षेत्रीले लोकपथलाई जानकारी दिए ।
उनका अनुसार अपहरणकारीले रिशवलाई सोमबार चितवनको भरतपुर महानगरपालिकास्थित नारायणगढबाट अपहरण गरेका थिए ।
आज कार्यालयबाट खटिएको प्रहरी टोलीले काठमाडौंको नयाँ बसपार्क क्षेत्रबाट बालकको उद्धार र उनीहरुलाई पक्राउ गरेको हो ।
‘सोमबार अपहरणमा परेका बालकको सकुशल उद्धार गरेका छौँ । अपहरणमा संलग्न ५ जनालाई पक्राउ गरी अनुसन्धान अघि बढाइएको छ । पक्राउ परेका सबै भारतीय नागरिक हुन्,’ प्रवक्ता एसपी थापा क्षेत्रीले भने ।
अपहरणमा परेका रिशवका बुबा सुनका गरगहना बनाउने कालीगढ रहेको प्रहरीले जनाएको छ । उनीहरुले रिशवका परिवारसँग २२ लाख रुपैयाँ फिरौती समेत माग गरेका थिए ।
के कति कारणले उनको अपहरण गरियो भन्ने खुल्न सकेको छैन । उनीहरुमाथि थप अनुसन्धान भइरहेको प्रहरीले जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया