पराजितपछि गगनलाई पत्नी अञ्जनाको ढाडस– ‘तिमी थाके देशको सपना थाक्नेछ’

काठमाडौं । नेपाली कांग्रेसका सभापति गगनकुमार थापा सर्लाही क्षेत्र नं ४ बाट पराजित भएका छन् । आइतबार बिहान आएको परिणाम अनुसार राष्ट्रिय स्वतन्त्र पार्टी (रास्वपा) का डा. अमरेशकुमार सिंहसँग थापा पराजित भएका हुन् ।

पराजित भएका थापालाई पत्नी अञ्जना केसी थापाले आगामी दिनमा थप बलियो भएर लाग्न सुझाएकी छन् ।

हारपछि गगनलाई नओइलाउनु भन्दै ढाडस दिएकी छन् ।

‘गगन, तिमी जस्तो मान्छे ओइलाउनु हुँदैन । तिमी नथाक, किनकि तिमी थाक्यौ भने यो देशको एउटा ठूलो सपना थाक्नेछ । तिम्रो आवाजले सदनमा मात्र होइन, अब हरेक नेपालीको मन–मनमा न्याय र परिवर्तनको झिल्को बाल्नुपर्छ,’ उनले भनेकी छन् ।

त्यस्तै उनले विचार र भिजनसहित लाखौँ मनहरुले विश्वास गरिरहेको भन्दै गगनलाई एक्लो जस्तो नबन्न आग्रह गरेकी छन् ।

‘हिजो तिमी एक्लै थियौ होला, आज तिमीसँग तिम्रो विचार र भिजनले बाँधिएका लाखौँ मनहरू छन्,’ उनले भनेकी छन्, विश्राम लेऊ, आफैलाई फेरि बटुल, तर याद राख, यो देशलाई तिम्रो खाँचो सकिएको छैन, बरु अझ बढेको छ ।’

गगनलाई ढाडस दिँदै पत्नी अञ्जनाले लेखेकी छन् :

प्रिय गगन,
आज शब्दहरू तिम्रो मेहेनतको अगाडि निकै साना महसुस भइरहेका छन्। तिम्रो त्यो अथक परिश्रम, जनताको घरदैलोमा पुग्दाको तिम्रो त्यो ऊर्जा, र परिवर्तनका लागि तिमीभित्र बलेको त्यो आगो, यी सबै कुराको साक्षी म छु।
तिमीले आफ्नो तर्फबाट कुनै कसर बाँकी राखेका थिएनौ। तिम्रो प्रयासमा कुनै खोट थिएन, मात्र समय र परिस्थितिले आज अर्कै बाटो रोज्यो। हार र जित त सिक्काका दुई पाटा हुन् गगन, तर ‘निष्ठा’ सबैको भागमा हुँदैन। आजको यो चुनावी परिणामले तिम्रो कदलाई घटाउन सक्दैन। कतिपय मानिसहरू पदका लागि राजनीति गर्छन्, तर तिमीले त राजनीतिका लागि आफ्नो जीवन नै समर्पित गर्यौ। यो एउटा निर्वाचनको हार मात्र हो, तिम्रो विचार र तिम्रो भिजनको हार होइन। निर्वाचनको एउटा अंकगणितले तिम्रो उचाई नाप्न सक्दैन गगन। तिमी एउटा नाम मात्र होइनौ, तिमी त यो देशका हजारौँ युवाहरूको धड्कन हौ, एउटा भरोसा हौ। एउटा युद्ध हार्दैमा योद्धा सकिँदैन, बरु ऊ अझ परिपक्व र बलियो भएर उभिन्छ। आज तिम्रो अनुहारमा देखिएको त्यो थकाइ हारको संकेत होइन, यो त एउटा लामो र महान यात्राको विश्राम मात्र हो। गगन, तिमी जस्तो मान्छे ओइलाउनु हुँदैन।
तिमी नथाक, किनकि तिमी थाक्यौ भने यो देशको एउटा ठूलो सपना थाक्नेछ। तिम्रो आवाजले सदनमा मात्र होइन, अब हरेक नेपालीको मन(मनमा न्याय र परिवर्तनको झिल्को बाल्नुपर्छ। हिजो तिमी एक्लै थियौ होला, आज तिमीसँग तिम्रो विचार र भिजनले बाँधिएका लाखौँ मनहरू छन्। विश्राम लेऊ, आफैलाई फेरि बटुल, तर याद राख, यो देशलाई तिम्रो खाँचो सकिएको छैन, बरु अझ बढेको छ। तिम्रो निष्ठा र तिम्रो अजेय यात्रामा मलाई सधैँ गर्व थियो, छ र सधैँ रहनेछ।
तिमी फेरि उठ्नेछौ, किनकि तिमी गगन हौ, जसलाई कुनै सीमाले छेक्न सक्दैन।