माघका लागि १२ वटा वाणिज्य बैंकले थप घटाए ब्याजदर 

काठमाडौं । माघ महिनाका लागि १२ वटा वाणिज्य बैंकले ब्याजदर थप घटाएका छन् । सञ्चालनमा रहेका २० मध्ये १२ वाणिज्य बैंकले पुसको तुलनामा माघमा निक्षेपको ब्याजदर घटाएका हुन् ।

यस्तै, ७ वटा वाणिज्य बैंकले व्यक्तिगत निक्षेपमा दिने अधिकतम ब्याजदर स्थिर राख्दा एउटा बैंकले भने ब्याजदर वृद्धि गरेको छ । प्राइम कमर्सियल बैंकले ब्याजदर बढाएको हो । प्राइमले ४.२५ प्रतिशतबाट बढाएर ब्याजदर ४.४० प्रतिशत पु-याएको छ ।  

पुस महिनाका लागि व्यक्तिगत मुद्दतीको अधिकतम ब्याजदर ५.५५ प्रतिशत रहेकोमा माघमा भने अधिकतम ५.५० प्रतिशत रहेको छ । 

यस्तै, पुसमा औसत ब्याजदर ४.८५ प्रतिशत रहेकोमा माघमा ब्याजदर घटेर औसत ४.७० प्रतिशत रहेको छ । 

अहिले सबैभन्दा धेरै ब्याज ग्लोबल आइएमई बैंकले दिएको छ । यो बैंकले सर्वसाधारणलाई ५.५० प्रतिशत ब्याज दिँदा स्ट्याण्डर्ड चार्टर्ड बैंकले भने सबैभन्दा कम ४.३६ प्रतिशत मात्रै ब्याजदर दिने छ । 

बैंकहरूसँग कर्जा लगानीयोग्य रकम उच्च भएपछि बैंकहरूको ब्याजदर घटिरहेको छ । हाल बैंकहरूसँग करिब ११ खर्ब रुपैयाँभन्दा धेरै कर्जा दिन मिल्ने रकम रहेको छ । कर्जा नजाँदा पछिल्लो समय बैंकहरूले ३ प्रतिशत र २.६७ प्रतिशत ब्याजदरमा राष्ट्र बैंकमा लगेर पैसा राखिरहेका छन् ।