काठमाडौं । राष्ट्रिय स्वतन्त्र पार्टी (रास्वपा) ले प्रदेश इन्चार्जहरूलाई जिम्मेवारीबाट मुक्त गरेको छ ।
फागुन २१ को निर्वाचनलाई मध्यनजर गर्दै उनीहरूलाई प्रदेश इन्चार्जबाट पदमुक्त गरिएको रास्वपाले जनाएको छ । मंगलबार बसेको सचिवालय बैठकले इञ्चार्जको भूमिका रहेका नेताहरूलाई जिम्मेवारीबाट मुक्त गरेको हो ।
अब प्रदेश इन्चार्जहरू केन्द्रीय सदस्यबाट पूर्ति गरिने भएको छ । प्रदेश इञ्चार्जको जिम्मेवारीबाट मुक्त गरिएकाहरूलाई निर्वाचन केन्द्रित गतिविधिमा लगाउने निर्णय पनि भएको छ ।
रास्वपाले गत वैशाखमा सातै प्रदेशका इन्चार्ज तोकेको थियो । कोशीमा सन्तोष परियार, मधेसमा मनीष झा, बागमतीमा लिमा अधिकारी, गण्डकी शिशिर खनाल, लुम्बिनीमा विपिन आचार्य, कर्णालीमा गणेश पराजुली र सुदूरपश्चिम हरि ढकाल इञ्चार्ज तोकिएको थियो ।
कोशी इञ्चार्जको जिम्मेवारीमा रहेका परियारले भने रास्वपा परित्याग गरिसकेका छन् ।
यस्तै, बैठकले कीर्तिपुर नगर समिति विघटन गर्ने निर्णय पनि गरेको छ ।
रास्वपाले नयाँ र वैकल्पिक राजनीतिक शक्तिसँग एकता र सहकार्यलाई उच्च प्राथमिकतामा राख्दै सोहीअनुसार छलफल अघि बढाउने निर्णय पनि गरेको छ ।
रास्वपाका महामन्त्री कवीन्द्र बुर्लाकोटीले भने, ‘जेनजी विद्रोहमा नैतिक समर्थन गने बाहेक सबै प्रतिगामी शक्तिलाई निर्वाचनबाटै परास्त गर्नेगरी पार्टीले सबै वैकल्पिक शक्तिसँग एकता र सहकार्य गर्ने निर्णय गरेको छ । यस विषयमा राजनीतिक संवाद समितिले निर्वाचन अयोगमा दर्ता भएका नयाँ दलहरूसँग छलफल जारी राखेको छ ।’
यो खबर पढेर तपाईलाई कस्तो महसुस भयो ?
प्रतिक्रिया