ढल व्यवस्थापन र सडक मर्मत छिटो गर्ने मन्त्री घिसिङको निर्देशन

काठमाडौं । शहरी विकासमन्त्री कुलमान घिसिङले बागमती नदी करिडोर क्षेत्रको ढल व्यवस्थापन, सडक स्तरोन्नति र सरसफाइका कामको अनुगमन गरेका छन् । 

मन्त्री घिसिङले शनिबार बिहान गुहेश्वरी–गोकर्ण खण्ड अन्तर्गत गोकर्णेश्वर नगरपालिका–५ जम्बुडाँडा क्षेत्रमा पुगेर कामको प्रगतिबारे जानकारी लिएका हुन् ।

जम्बुडाँडा क्षेत्रमा ढल जाम हुँदा फोहोर नदीमा मिसिएको छ भने सडक पनि बिग्रिएको छ । यद्यपि, ढल र सडक मर्मतका लागि ठेक्का लगाइएको भए पनि काम सन्तोषजनक ढंगले सम्पन्न भएको छैन ।

मन्त्री घिसिङले निर्माण व्यवसायीलाई निर्देशन दिँदै भने, ‘नदी सफा भए मात्र शहर सफा हुन्छ । त्यसैले ढल व्यवस्थापन, सडक मर्मत र नदीमा फालिएको फोहोर हटाउने काम उच्च प्राथमिकतामा राखिएको छ ।’

अनुगमनका क्रममा गुहेश्वरी–गोकर्ण खण्डमा बेवारिसे अवस्थामा रहेको सवारी साधन हटाइएको छ भने नदीमा फालिएको फोहोर र लेदो हटाउने काम सुरु गरिएको छ । मन्त्री घिसिङले उक्त क्षेत्रको चेक बाँध सञ्चालनमा ल्याएर साना तलाउ बनाएर पर्यटकीय क्षेत्रको रूपमा विकास गर्ने योजना रहेको बताए ।

हाल चेक बाँध निर्माण भइसकेको भए पनि नदीमा फोहोर र लेदो जम्मा हुँदा सञ्चालनमा आउन सकेको छैन। मन्त्री घिसिङले सबै फोहोर हटाइने सुनिश्चित गर्दै कामलाई तीव्रता दिन निर्देशन दिएका छन्।