जेनजी आन्दोलनमा आगजनी र प्रहरी कुट्नेहरू धमाधम पक्राउ पर्दै, साँखु प्रहरीले समात्यो दुई जनालाई

काठमाडौं । जेनजी आन्दोलनका क्रममा साँखुस्थित प्रहरी प्रभागमा आगजनी र प्रहरीमाथि कुटपिटमा संलग्न भएको अभियोगमा दुई जनालाई प्रहरीले पक्राउ गरेको छ । पक्राउ पर्नेमा काठमाडौंको शंखरापुर नगरपालिका–३ घर भएका ४७ वर्षीय सानुकान्छा वाइबा र मकवानपुरको मकवानपुरगढी गाउँपालिका–३ घर भई शंखरापुर नगरपालिका– ७ बस्ने ४३ वर्षीय प्रल्हाद दाहाल छन् । 

प्रहरी प्रभाग साँखुले उनीहरूलाई थप अनुसन्धानका लागि प्रहरी वृत्त बौद्ध पठाएको छ ।

यस्तै, प्रहरी वृत्त बौद्धले जेनजी आन्दोलनका क्रममा लुटपाट भएको हतकडी र सोको चाबीसहित एक जनालाई पक्राउ गरेको छ । पक्राउ पर्नेमा झापाको दमक नगरपालिका–२ घर भई हाल काठमाडौंको बालाजु बस्ने २९ वर्षीय साजन श्रेष्ठ छन् । उनलाई यही कात्तिक ८ गते बेलुकी ७ बजे काठमाडौंको गोकर्णेश्वर नगरपालिका– ७ दक्षिण ढोकाबाट नियन्त्रणमा लिइएको हो । उनलाई थप अनुसन्धानका लागि प्रहरी वृत्त बौद्धमा राखिएको प्रहरीले जनाएको छ ।