झापाको दमकमा बसको ठक्करबाट साइकल यात्रीको मृत्यु

भद्रपुर । झापाको दमक–४ चियाबगानस्थित पूर्वपश्चिम राजमार्गमा आज बिहान भएको सवारी दुर्घटनामा परी एक साइकलयात्रीको मृत्यु भएको छ ।

उर्लाबारीबाट दमकतर्फ आउँदै गरेको प्रदेश नं १–०१–००१ ख ४३६३ नम्बरको यात्रुबाहक बसले विपरीत दिशाबाट ताराबारीतर्फ जाँदै गरेका साइकलयात्रीलाई ठक्कर दिँदा दुर्घटना भएको हो ।

दुर्घटनामा परेका दमक–४ घरघरे निवासी ६० वर्षीय सोमबहादुर विकको मृत्यु भएको इलाका प्रहरी कार्यालय दमकका प्रहरी नायब उपरीक्षक (प्रनाउ) खगेन्द्रबहादुर खड्काले जानकारी दिए ।

गम्भीर घाइते भएका विकलाई उपचारका लागि तत्काल दमक अस्पताल लगिएको भए पनि उपचारकै क्रममा निधन भएको प्रनाउ खड्काले बताए ।

दुर्घटनामा संलग्न यात्रुबाहक बस र चालक मकवानपुर हेटौँडा उपमहानगरपालिका–७ का ४७ वर्षीय राजेन्द्र गौतमलाई प्रहरीले नियन्त्रणमा लिई आवश्यक अनुसन्धान अगाडि बढाएको जनाएको छ।

प्रहरीले घटनाको विस्तृत अनुसन्धान जारी रहेको जनाएको छ।