नेविसंघ कार्यसमितिको म्याद भदौ २ गतेसम्म

काठमाडौं । कांग्रेसको भातृ संगठन नेपाल विद्यार्थी संघको वर्तमान कार्यसमितिको म्याद आउँदो भदौ २ गतेसम्म तोकिएको छ ।

नेपाली कांग्रेसका सह–महामन्त्री डा प्रकाशशरण महतको घरमा बुधबार बसेको निर्देशक समितिको बैठकले नेविसंघको वर्तमान कार्यसमितिको म्याद तोकिएको बताएको हो । 

बैठकले नेविसंघको महाधिवेसनका लागि भएको कार्ययोजना निर्देशक समितिलाई दश दिनभित्रै बुझाउन पनि निर्देशन दिएको छ ।

विशेष परिस्थितिमा तीन महिना अवधि बढाउन सक्ने प्रावधान अनुसार तीन महिनामा अधिवेशन गर्ने आधार पेश गर्न निर्देशक समितिले अध्यक्ष नैनसिंह महरालाई निर्देशन दिएको कांग्रेस मुख्य सचिव कृष्ण पौडेलले जनाएका छन् । 

संघको १२ औं महाधिवेसनका विषयलाई लिएर आन्तरिक विवाद भएपछि निर्देशक समितिको बैठक बसेको हो ।