के एकता भएपछि प्रचण्डले वेपत्ता परिवारलाई भुलेकै हुन् त ?

काठमाडौं– विगतका वर्षहरुमा तत्कालिन नेकपा माओवादी केन्द्रका अध्यक्ष प्रचण्डले वेपत्ताहरु र उनीहरुको परिवारबारे चासो दिँदै विज्ञप्ति निकाल्थे । कार्यक्रममा सहभागि भएर  वेपत्ता परिवारलाई सान्त्वना पनि दिन्थे । उनीमात्रै होइन माओवादी केन्द्रका सिंगो नेताहरु पार्टी कार्यालय कोटेश्वर पेरिसडाँडा पुग्थे । 

तर, अहिले अवस्था फेरिएको हो कि भन्ने वेपत्ता परिवारमा परेको छ ।  नपरोस् पनि कसरी, एमाले र माओवादी केन्द्रबीच एकता भएसँगै  वेपत्ता  स्मृति दिवसमा प्रचण्ड सहभागि त भएनन् नै कुनै विज्ञप्ति पनि निकालेनन् ।   उनी व्यवस्त भएको भन्दै कार्यक्रममा सहभागि नभएको जानकारी दिइयो । 

सोमबार  तत्कालिन नेकपा माओवादी केन्द्रले मनाउँदै आएको वेपत्ता स्मृति दिवस एमालेसँग एकता भएपछि पनि मनाइयो  तर, प्रचण्ड र केपी ओली दुबै अध्यक्ष सहभागि नभएका हुन् । 

वेपत्ता  परिवार समाज नेपालको ब्यानरमा नेकपाको कार्यालय (तत्कालिन नेकपा माओवादीको कार्यालय) कोटेश्वर पेरिसडाँडामा भएको सभामा प्रमुख अतिथिको रुपमा नेकपाका नेता सुवासचन्द्र नेम्वाङको उपस्थिति रह्यो । नेम्वाङले विशेष  कारणले ओली र प्रचण्ड बैठकमा सहभागि हुन नसकेको बताए । 

उनले वेपत्ता परिवारको पीडाबारे पार्टी गम्भीर रहेको भन्दै सधै पीडामा बल्झिरहने अवस्था आउँन नदिने प्रतिबद्धता जनाए । 

सहीद, वेपत्ता र घाइतेहरुको त्यागले अहिलेको अवस्थासम्म आइपुगेको भन्दै नेम्वाङले सहिद र वेपत्ताहरुको  सपना  पूरा गरिछाड्ने बताए । 

उनले भने, ‘तपाईँको पीडा मैले मशसुस गरेको छु । जनयुद्धकालमा मैले पनि पीडितको पक्षमा मुद्दा लडेको  छु । निरंकुशताको विरुद्ध लड्दा नै अहिलेको अवस्थामा आएको छ ।’ 

नेकपाका शीर्ष नेता सहभागि नभएको कार्यक्रममा नेताहरु हितमान शाह्य, झक्कु सुवेदी, अजयशंकर नायक लगायत भने सहभागि थिए । 

सभामा सहभागि कतिपय वेपत्ता  परिवारले पार्टी एकतापछि आफूहरुलाई नेतृत्वले बिर्सिएको भन्दै दुखित समेत देखिन्थे ।  

यद्यपी पार्टी एकता भएकोमा भने उनीहरुले सुखी जनाउँदै आफूहरुलाई पनि सँगसँगै लिएर  गए हुन्थ्यो भन्ने भाव जनाएका पाइन्थे । 

स्मरण रहोस् एकताको भोलिपल्ट पेरिसडाँडाको पार्टी कार्यालय अवलोकनको क्रममा वेपत्ताको शालीकमा ओलीसहित प्रचण्डले माल्यापर्ण गरेका थिए । 

२०५५ साल जेठ ७ गते तत्कालीन प्रहरीले काठमाडौंको सुन्धारास्थित टेबहालबाट माओवादी केन्द्रीय सदस्य दण्डपाणी न्यौपाने र मिलन नेपालीसहित चार जनालाई गिरफ्तार गरी बेपत्ता बनाएको सम्झनामा यो दिवस मनाउन थालिएको हो ।