काठमाडौं । परराष्ट्रमन्त्री शिशिर खनाल अर्को साता चीन भ्रमणमा जाने भएका छन् । भारत भ्रमण सम्पन्न गरेर स्वदेश फर्किएलगत्तै उनको चीन भ्रमण तय भएको हो ।
स्रोतका अनुसार मन्त्री खनाल जेठ ३१ गते चीन प्रस्थान गर्ने कार्यक्रम रहेको छ । उनले चिनियाँ विदेशमन्त्री वाङ यी तथा चिनियाँ कम्युनिस्ट पार्टीका विदेश विभाग प्रमुख लिउ हाइसिङसँग भेटवार्ता गर्नेछन् ।
भ्रमणका क्रममा मन्त्री खनालले चीनमा रहेका नेपाली समुदाय तथा डायस्पोराका प्रतिनिधिहरूसँग पनि अन्तर्क्रिया गर्ने कार्यक्रम रहेको छ । उनी असार १७ गते नेपाल फर्किने तालिका रहेको बताइएको छ ।
यद्यपि, परराष्ट्र मन्त्रालयले मन्त्री खनालको चीन भ्रमणको मिति, कार्यक्रम र एजेन्डाबारे औपचारिक रूपमा कुनै जानकारी सार्वजनिक गरेको छैन ।
यसअघि परराष्ट्रमन्त्री खनाल जेठ २२ गते भारत भ्रमणमा गएका थिए र जेठ २४ गते काठमाडौं फर्किएका थिए। भारत भ्रमणका क्रममा उनले भारतीय विदेशमन्त्री एस जयशंकर तथा सत्तारुढ भारतीय जनता पार्टी (भाजपा) का विदेश विभाग प्रमुख विजय चौथाइवाले लगायतसँग भेटवार्ता गरेका थिए ।
चीन भ्रमणलाई नेपाल–चीन द्विपक्षीय सम्बन्ध, कूटनीतिक सहकार्य तथा क्षेत्रीय चासोका विषयमा केन्द्रित महत्वपूर्ण उच्चस्तरीय भ्रमणका रूपमा हेरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया