जनता समाजवादी पार्टी (जसपा) भित्रको कीर्ते हस्ताक्षर काण्ड अहिले बाहिर आएको छ ।
जसपाका एक जना अध्यक्ष उपेन्द्र यादवले अर्का अध्यक्ष महन्थ ठाकुरले पार्टीमा बहुमत पुर्याउन नेताहरुको कीर्ते हस्ताक्षर गरेको आरोप लगाएपछि नेपाली राजनीति कतिसम्म फोहोरी बन्दैछ भन्ने प्रमाणित गरेको छ ।
जसपामा दुई पक्षको विवादले उक्त पार्टीको हालत के छ भन्ने पनि स्पष्ट पारेको छ । जसपालाई बारम्बार गैरजिम्मेवार पार्टी भनेर पनि आरोप लाग्ने गरेको छ ।
सत्ताका लागि मरिमेटेको आरोप लाग्दै आएको जसपाभित्र ठाकुर पक्षले डा.बाबुराम भट्टराई सम्मको कीर्ते हस्ताक्षर गरेर आफू बहुमतमा रहेको र आफू पक्ष नै आधिकारिक रहने भनेर निर्वाचन आयोगमा बुझाएको पत्रले नेपालका राजनीतिक दल कतिसम्म अव्यवस्थित छन् भन्ने स्पष्ट पारेको छ ।
तराई–मधेशका मुद्दा समाधान गर्ने भन्दै आइरहेको जसपा आन्तरिक कलहमै रुमलिँदा के तराई–मशेसका समस्या समाधान होलान त ? राजनीतिक विश्लेषक सीके लालका विचारमा तराई–मधेशका मुद्दा अहिले सम्बोधन हुनेगरी जसपाले काम गरेको छैन् ।
विवादको जरो
जसपामा विवादको चुरो भनेकै प्रधानमन्त्री केपी शर्मा ओलीको पक्षमा र विपक्षमा लाग्ने भन्ने नै हो ।
जसपामा पूर्व राजपा पक्षका नेताहरु अध्यक्ष ठाकुर र नेता राजेन्द्र महतोले ओलीलाई समर्थन गरेर गत जेठ २१ मा सरकारमा गएका छन् । अर्का अध्यक्ष उपेन्द्र यादव र डा.बाबुराम भट्टराई भने दुई–दुई पटक प्रतिनिधिसभा विघटन गरेका (गत पुस ५ र जेठ ७) प्रधानमन्त्री ओलीलाई साथ दिनु हुँदैन भन्ने अडानमा रहेका कारण जसपाभित्र विवाद उत्कर्षमा पुगेको हो ।
प्रधानमन्त्री ओलीले पुस ५ मा प्रतिनिनिधिसभा विघटनका बेला एक भएर विरोध गरेको जसपामा अहिले ठाकुर पक्षले जेठ ७ को विघटनलाई स्वागत गरेर सरकारमा गएको छ ।
यादव पक्ष भने ओलीको कदमको विरोध गर्दै कांग्रेस, माओवादी, एमालेको माधव नेपाल पक्ष र जनमोर्चा सम्मिलित विपक्षी गठबन्धनमा छ । खास गरी सर्वाेच्च अदालतले गत फागुन २३ मा एमाले र माओवादी केन्द्रलाई पूर्ववत अवस्थामा फर्काउने फैसला गरेपछि प्रधानमन्त्री ओलीले सत्ता टिकाउनका लागि जसपालाई प्रयोग गर्ने अवस्थामा पुगे । जसले जसपाभित्र बिग्रहको बिजारोपण गरायो ।
जसपाको मुख्य विवाद भनेको सरकारमा जाने ठाकुरको निर्णय यादवले नमानेको र सरकारमा नजाने पार्टीको निर्णय ठाकुरले नमानेको भन्ने हो । यसैमा दुवैले एक–अर्कालाई पार्टीको नीति नमानेको भन्दै कारवाही गरे ।
यादव पक्षले कार्यकारिणी समितिको बहुमतले ठाकुरलाई कारवाही गरेको पत्र जेठ १८ मा निर्वाचन आयोगमा बुझायो । ठाकुर पक्षले पनि
यादवलाई कारवाही गरेको पत्र सोही दिन आयोगमा पठायो । यादवले ठाकुरलाई कारवाही गरिएकोबारे बहुमत सदस्यको हस्ताक्षर सहितको पत्र बुझाए । तर ठाकुरले सदस्यहरुको हस्ताक्षर बुझाउन सकेनन् । हस्ताक्षर जुटाउन २३ जेठमा ठाकुर पक्षले आयोगसँग एक साताको समय माग्यो । तर ठाकुर पक्षले त्यो अवधिभित्र पनि हस्ताक्षर बुझाउन नसकेपछि आयोगले जेठ ३० मा दुबैले एक अर्कालाई गरेको कारवाही मिलेन भनेर निर्णय गर्यो । आयोगले यादव पक्षको बहुमतको निर्णयलाई पनि लत्याइदियो ।
पार्टीमा अल्पमतमा परेपछि ठाकुर पक्षले बहुमत जुटाउन जेठ ३० मै यादव पक्षका २० जना केन्द्रीय कार्यकारिणी सदस्यलाई हटाएर आफू पक्षका २० जना मनोनित गरे । यसलाई यादव पक्षले ठाकुरले कीर्ते काम गरेको आरोप लगाएको छ । ठाकुर पक्षले २० जना मनोनित गरेको बिवरण आयोगमा पठाइसकेको छ । यादव पक्षले ठाकुरले केन्द्रीय कार्यकारिणी समितको बैठक नै नबसी कीर्ते पत्र आयोगमा बुझाएकाले मान्यता नदिन निवेदन दिएको छ । जसपा नेता डा. भट्टराइले त ट्वीट गर्दै ‘ठाकुरले ८० वर्षको उमेरमा पनि कीर्ते काम गरेको’ आरोप लगाएका छन् ।
ओली-विद्या राजमा नेपाली राज्य र राजनीतिको नैतिक धरातल पातालमै भासिने भो! मुहानमै फोहोर नाला मिसिएपछि तल सफा हुने कुरै भएन।स्वच्छ छवीका मानिएका८०बर्षे नेताले समेत पार्टी बैठकको नक्कली श्रेस्ता बनाएर निर्वाचन आयोगमा मेरो समेत हस्ताक्षर दुरूपयोग गरेको देखेर स्तब्ध छु!NOT IN MY NAME!
— Baburam Bhattarai (@brb1954) June 20, 2021
ठाकुर पक्षले २०७७ पुस ७ मा बसेको केन्द्रीय कार्यकारिणी समितिको बैठकले कार्यकारिणी हेरफेर, प्रमाणीकरण तथा पार्टीको आधिकारिक पत्राचारको अधिकार अध्यक्ष ठाकुरलाई दिएको भन्ने माइन्यूट आयोगमा बुझाएको छ । तर यादव पक्षका नेता गंगानाराण श्रेष्ठ त्यस्तो निर्णय नभएको भन्दै ठाकुरले नक्कली माइन्यूट खडा गरेर आयोगमा बुझाएको बताउँछन् ।
जसपाको केन्द्रमा मात्रै होइन स्थानीय र प्रदेश तहमा पनि नेता कार्यकर्ता दुई कित्तामा विभाजित छन् । ठाकर पक्षका नेता डा. सुरेन्द्र झा भने कीर्ते माइन्यूट र हस्ताक्षर नभएको दाबी गर्छन् । पार्टी भित्रको बेथितिको जिम्मेवार यादव पक्ष भएको उनको आरोप छ ।
विगतमा जसपाले उठाएका विभिन्न माग सम्बोधन हुन नसक्ने बताएका प्रधानमन्त्री ओलीले अब माग सम्बोधन गर्ने प्रतिवद्धता देखाएको भन्दै ठाकुर पक्ष सत्तामा उक्लिएको हो ।
राजनीतिक विश्लेषक लाल भने त्यो पत्याउन तयार छैनन् । सत्तामा जान बिगतमा पनि दलहरुमा यस्ता कीर्ते हस्ताक्षर हुने गरेकामा ती बाहिर आएका थिएनन् । अहिले भने सतहमा आएको विश्लेषक लालको भनाई छ ।
जसपा भित्रको आन्तरिक झगडाले उक्त पार्टीको आन्तरिक राजनीति कस्तो छ भन्ने स्पष्ट देखिएको छ । आन्तरिक राजनीतिमा कमजोर देखिएको जसपाले तराई–मधेशका मुद्दा कसरी सम्बोधन गर्ला ? यो प्रश्न उब्जिएको छ ।
आफ्नो पार्टीलाई व्यवस्थित तवरले चलाउन नसकेको जसपाको विवाद निरुपण गर्ने जिम्मा फेरि निर्वाचन आयोगमै पुगेको छ । दुबै पक्ष आयोगले कसलाई मान्यता देला भनेर पर्खेर बसेका छन् । आयोगले सोमबार नै ठाकुरलाई आधिकारिकता माग दाबी बारे १५ दिनभित्र आयोगमा लिखित जवाफ पेश गर्न भनेको छ ।
सबै प्रक्रिया पूरा गर्दा जसपाको आधिकारिकता निरुपण गर्न झण्डै एक महिनासम्म लाग्न सक्ने बताइएको छ ।
लेखकबाट थप
व्यवस्था फेरियो, अवस्था फेरिएन
त्यो कालो शुक्रवार : बिलियार्ड हलमा राजा वीरेन्द्रको वंशनाश
जसपाभित्रको दुई धार : पहिले छाँया अहिले घाम
एमालेमा ओली रणनीति : अप्ठ्यारोमा एकताको कुरा, सहज हुँदा कारबाही
एमाले विवादको फाइदा कांग्रेसलाई : कर्णाली प्रदेशबाट सत्तारोहण शुरु
कांग्रेस : कहिले आउला युवा पुस्ताको पालो ?
यो खबर पढेर तपाईलाई कस्तो महसुस भयो ?
प्रतिक्रिया