९ कोरोना संक्रमितमध्ये सुदूरपश्चिम प्रदेशकै ४ जना !

लोकपथ संवाददाता

२०७६,चैत्र,२२,शनिवार १४:३०

काठमाडौं । आज मात्रै नेपालमा थप नयाँ तीन जनामा कोरोनाको संक्रमण पाइएको छ । यो सँगै नेपालमा कोरोना भाइरसका संक्रमितहरुको संख्या ९ पुगेको हो ।

ति मध्ये ४ जना संक्रमितहरु सुदूरपश्चिम प्रदेशका रहेका छन् । स्वास्थ्य मन्त्रालयको आधिकारिक फेसबुक पेजबाट आज सुदूरपश्चिमका थप तीन जनामा कोरोना भाइरस पोजेटिभ पाइएको जानकारी गराइएको थियो ।

मन्त्रालयका अनुसार १ जना संक्रमित स्थानीय र अन्य दुईजना भने विदेशबाट आएका थिए ।

सातौँ संक्रमित व्यक्ति धनगढीकी ३४ वर्षीया महिला रहेकी छन् । त्यस्तै आठौँ संक्रमित कैलालीका २१ वर्षका पुरुष रहेका छन् । उनी भारतको मुम्बईबाट नेपाल आएका थिए ।

त्यस्तै नवौँ संक्रमित भारतको उत्तराखण्डबाट आएका कञ्चनपुरका ४१ वर्षीय पुरुष रहेका छन् । उनीहरु तीनै जनालाई अहिले सेती प्रदेसिक अस्पताल धनगढीको आइसोलेसनमा राखेर उपचार भईरहेको छ ।

यसअगाडि नेपालमा पाइएका १ अन्य संक्रमितहरु पनि सुदूरपश्चिमकै रहेका छन् । यसअघि युएईबाट फर्किएका ३४ वर्षीय युवकलाई १४ चैत्रमा कोरोना भाइरस भएको पत्ता लागेको थियो ।

चौथा संक्रमित धनगढीस्थित सेती अञ्चल अस्पतालमा उपचार गराउने क्रममा संक्रमित भएको पत्ता लागेको थियो ।

नेपालका चौथो कोरोना संक्रमित व्यक्ति पनि कैलालीको धनगढीका रहेका छन् । योसँगै नेपालका ९ कोरोना संक्रमित मध्ये ४ जना सुदूरपश्चिम प्रदेशका रहेका छन् ।

यो पनि पढ्नुहोस्: नेपालमा कोरोनाको छैटौं संक्रमित फेला

अपडेट : अर्को एकजना नेपालीमा कोरोना पोजेटिभ, चैत्र ४ गतेकै फ्लाईटमा आएका थिए नेपाल

६ जना कोरोना संक्रमित नेपाली, को कहाँ बाट आएका थिए ?

पहिलो संक्रमित : चीनबाट फर्केका युवकको ९ माघमा संक्रमण पत्ता लागेको थियो

दोस्रो संक्रमित : फ्रान्सबाट फर्केकी १९ वर्षीया किशोरीको ९ चैत्रमा पत्ता लागेको

तेस्रो संक्रमित : युएईबाट फर्किएका ३२ वर्षीय युवकको १२ चैत्रमा पत्ता लागेको

चौंथो संक्रमित : युएईबाट फर्किएका ३४ वर्षीय युवकको १४ चैत्रमा पत्ता लागेको

पाचौं संक्रमित : बेल्जियमबाट फर्किएकी १९ वर्षीया किशोरीको १५ चैत्रमा पत्ता लागेको

छैठौं संक्रमित : कतार हुँदै फर्किएकी बाग्लुङकी महिलाको २० चैत्रमा पत्ता लागेको

कोरोनाबाट बच्न यी ८ कुराहरुको ध्यान दिनुहोस् !

कोरोनाबाट कसरी सतर्क रहने ? र के गर्दा कोरोनाबाट बच्न सकिन्छ ? भन्ने बारेमा स्वास्थ्य विशेषज्ञहरुले ध्यान दिनुपर्ने बिभिन्न कुराहरुको बताएका छन् ।

आज हामी तपाईलाई तिनै महत्वपूर्ण कुराहरुको बारेमा जानकारी दिनेछौँ ।

१. कोरोना भाइरसबाट बच्नको लागि हाइजीन बनाइराख्नु पर्दछ । आफ्नो आसपासको सरसफाईमा ध्यान दिनुपर्दछ । खोकी र हाच्छयुँ गर्दा रुमालको प्रयोग गर्नुपर्दछ । समय समयमा साबुन पानीले हात धुनु पर्दछ ।

२. राम्रोसँग हात धुनका लागि साबुन वा स्यानेटाइजरको प्रयोग गर्नुपर्दछ । त्यसपछिहात लगभग २० सेकेण्डसम्म सुकाउनु पर्दछ । हात धोएपछि सफा कपडाले पुछ्ने गरौँ ।

३. घरबाट बाहिर निस्किँदा ‘एन -९५’ मास्क वा सर्जिकल मास्कको प्रयोग गरौँ ।

४. बजारबाट किनिएका कुनै पनि सामान खाद्य पदार्थहरु काँचोमै नखानुस् । मासु सब्जीहरु खानु भन्दा अगाडि राम्रोसँग उमालेर मात्र खाऔँ ।

५. इन्फेक्टेड वा अन्जान व्यक्तिसँग धेरै समयसम्मसँग नबसौँ । कोहि पनि व्यक्तिसँग हात मिलाए पछि साबुन पानीले राम्रोसँग हात धोऔँ ।

६. आँखा, नाक वा मुखमा पटक पटक हात नलगाऔँ । यदि छोइहालेमा तत्कालै हात धोऔँ ।

७. यदि तपाईलाई खोकी लाग्छ, खकार आउँछ र सास फेर्न अफ्ठेरो हुन्छ भने तत्कालै डाक्टरको सल्लाह र सुझव लिने गरौँ ।

८. डाक्टरबाट लिएको सल्लाहलाई नियमित पालना गरौँ ।

यो पनि पढ्नुहोस् : कोरोना भाइरसबाट कसरी बच्ने ?

कोरोना भाइरसबाट कसरी बच्ने ?

जोखिम न्यूनीकरण

हातलाई साबुन–पानीले धुने वा हातमा अल्कोहलजन्य सेनिटाइजर दलौं
खोक्दा नाक र मुख हात, टिस्यु पेपर वा कुहिनोले छोपौं
चिसो लागेको वा रुघाखोकीको लक्षण भएकाहरूको निकट सम्पर्कबाट बचौं
मासु र अण्डालाई पकाएर खाऔं
जंगली वा पालिएको जनावरसँग असुरक्षित सम्पर्कबाट बचौं

कति खेर धुने हात ?

खोक्दा वा हाच्छिउँपछि
बिरामी व्यक्तिको स्याहार गरेपछि
चर्पी प्रयोग गरेपछि
हात फोहोर देखिएपछि
बाहिरबाट घर आएपछि
जनावर वा जनावरको फोहोर छोएपछि

कसरी हुन्छ संक्रमण ?

चिकित्सकहरुका अनुसार यो भाइरस अत्याधिक संक्रामक छ ।

भाइरसबाट संक्रमित व्यक्तिको सिंगान, खकार, थुक आदिजस्ता शरीरका तरल पदार्थबाट यो भाइरस सर्ने चिकित्सकले बताएका छन् । संक्रमित व्यक्तिले हाछिउँ गर्दा, खोक्दा, थुक्दा यो भाइरस हावामा मिसिने र बिरामीको सम्पर्कमा भएका व्यक्तिहरुमा श्वासप्रश्वासको माध्यमबाट सर्ने हुन्छ ।

विशेष गरी यी गतिविधिबाट कोरोना भाइरसको संक्रमण हुनसक्छः

हावाको माध्यमबाट

प्रत्यक्ष सम्पर्क (हात मिलाउने) अंकमाल गर्ने, छुने आदि

भाइरस भएका वस्तु छोएर आफ्नो आँखा, नाक, मुख छुँदा