काठमाडौं । सभामुख डोलप्रसाद अर्यालले देशलाई समृद्ध, सुशासित र भ्रष्टाचारमुक्त बनाउन सबै क्षेत्रको सक्रिय भूमिका आवश्यक रहेको बताएका छन् ।
शनिबार काठमाडौंमा आयोजित एक कार्यक्रममा बोल्दै उनले सरकार गलत दिशामा गएको वा काममा ढिलाइ भएको अवस्थामा नागरिक तथा सामाजिक संघसंस्थाले ‘घण्टी बजाएर’ सचेत गराउनुपर्ने बताए । कानून निर्माण प्रक्रियामा आवश्यक सुझाव दिन तथा सरकारका कमजोरीप्रति समयमै खबरदारी गर्न उनले आग्रह गरे ।
सभामुख अर्यालले सुशासन स्थापना, भ्रष्टाचार नियन्त्रण र आर्थिक समृद्धिको लक्ष्य वर्तमान पुस्ताले नै पूरा गर्नुपर्नेमा जोड दिँदै देशको विकास र सुधारको जिम्मेवारी अहिलेको नेतृत्वले वहन गर्नुपर्ने बताए ।
उनले निजी क्षेत्रलाई प्रोत्साहन गर्दै लगानीमैत्री वातावरण सिर्जना गर्नुपर्ने आवश्यकता औँल्याए । साथै, वैदेशिक रोजगारीमा रहेका नेपाली युवालाई स्वदेश फर्काउने अवस्था निर्माण गरी नेपाललाई बस्न र लगानी गर्न उपयुक्त राष्ट्रका रूपमा विकास गर्नुपर्ने धारणा व्यक्त गरे ।
नेपालका प्राकृतिक, धार्मिक तथा सांस्कृतिक सम्पदाको प्रभावकारी प्रवर्द्धन गर्नुपर्ने उल्लेख गर्दै उनले लुम्बिनी, सगरमाथा, पशुपतिनाथ मन्दिर, मुक्तिनाथ मन्दिर, जानकी मन्दिर तथा पाथीभरा मन्दिर जस्ता गन्तव्यहरूले नेपाललाई अन्तर्राष्ट्रिय पर्यटनको प्रमुख केन्द्र बनाउन सक्ने बताए ।
कार्यक्रममा उनले देशको संविधानलाई समयानुकूल बनाउन आवश्यक सुधार तथा संशोधनका विषयमा पनि ठोस सुझाव दिन सरोकारवालासँग आग्रह गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया