आयोगको प्रतिवेदनमाथि एमाले नेता ज्ञवालीको प्रश्नै प्रश्न

काठमाडौं । नेकपा एमालेका नेता प्रदीप ज्ञवालीले गौरीबहादुर कार्की नेतृत्वको जाँचबुझ आयोगको प्रतिवेदनमाथि प्रश्न उठाएका छन् । उनले प्रतिवेदनलाई एउटा कलाविहीन नाटकको संज्ञा दिएका छन् । उनले भदौ २३ को गोली प्रहारको विस्तृत चर्चा भएको तर भदौ २४ को विध्वंस र राष्ट्र दहनबारे प्रतिवेदन रहस्यमय रूपमा मौन रहेको टिप्पणी गरेका छन् । 

उनले कार्की श्रीमानको निष्कर्षमा कुनै विस्मय नलागेको भएपनि झन्डै ३० वर्ष प्रहरी संगठनमा बिताएका अधिकृत र कानुनका जानकारहरू समेतले ‘जाँचबुझ’, ‘अनुसन्धान’ शब्द र राष्ट्रिय सुरक्षाकै धज्जी उडाउने यस्तो कागजमा कसरी हस्ताक्षर गरे होला भनेर प्रश्न गरेका छन् । 

कार्की आयोगको प्रतिवेदनमाथि यी हुन् नेता ज्ञवालीले उठाएका प्रश्न जस्ताको तस्तै-

बहुचर्चित ‘कार्की आयोग’ को प्रतिवेदन:
भदौ २३ को गोली प्रहारको विस्तृत चर्चा, तर भदौ २४ को विध्वंस र राष्ट्र दहनबारे प्रतिवेदन रहस्यमय रूपमा मौन।
भदौ २३ मा बलप्रयोग गरेर भए पनि संसद् भवन बचाउन प्रयास गर्ने सुरक्षाकर्मीमाथि पनि कारबाही सिफारिस, भदौ २४ मा सिंहदरबार, सर्वोच्च अदालत र राष्ट्रपति भवन लगायत सार्वजनिक सम्पत्ति जोगाउन बलप्रयोग नगरेकोमा पनि उनीहरूमाथि कारबाहीको सिफारिस ।
तत्कालीन राजनीतिक, प्रशासनिक र सुरक्षा नेतृत्वमाथि अनुसन्धान र अभियोजन गर्नै बाँकी, तर कानुनको दफा नै तोकेर कारबाहीको सिफारिस ।
पत्रकारको योग्यता, संवैधानिक नियुक्ति, मन्त्रिपरिषद् गठन लगायत क्षेत्राधिकारसँग सम्बन्धै नभएका या कम महत्त्व राख्ने विषयमा निबन्ध लेख्न पर्याप्त समय,
तर शान्तिपूर्ण प्रदर्शनलाई निषेधित क्षेत्र तोडेर संसद् परिसरसम्म पुर्‍याउने र हिंसात्मक बनाउने घुसपैठियाहरू को थिए र २४ गते विभिन्न रासायनिक पदार्थको मिश्रणबाट मोलोतोभ ककटेल बनाएर सार्वजनिक र निजी सम्पत्ति खरानी बनाउनेहरू को थिए– खोज्न समय पुगेन ।
अर्थात्– एउटा कलाविहीन नाटकको प्रदर्शन, जसको पटकथा ( स्क्रिप्ट) कार्की श्रीमानले भदौ २४ मै लेखिसक्नु भएको थियो ।
त्यसैले कार्की श्रीमानको निष्कर्षमा त कुनै विस्मय लागेन, तर झन्डै ३० वर्ष प्रहरी सङ्गठनमा बिताएका अधिकृत र कानुनका जानकारहरू समेतले ‘जाँचबुझ’, ‘अनुसन्धान’ शब्द र राष्ट्रिय सुरक्षाकै धज्जी उडाउने यस्तो कागजमा कसरी हस्ताक्षर गर्नुभए होला ?