ब्राजिलको विश्वकप तयारी टोली घोषणा, नेयमार खेल बाहिरै

काठमाडौं । आगामी जुनमा हुने विश्वकपको तयारीस्वरूप ब्राजिलले खेलका लागि आफ्नो टोली सार्वजनिक गरेको छ । प्रशिक्षक कार्लो एन्चेलोटीले केही नयाँ अनुहारलाई मौका दिँदा अनुभवी स्टार नेयमार भने टोलीबाहिरै रहेका छन् ।

विश्वकपअघिको अन्तिम तयारीका रूपमा ब्राजिलले फ्रान्स र क्रोएसियाविरुद्ध खेल्ने मैत्रीपूर्ण खेलका लागि आफ्नो टोली घोषणा गरेको हो ।  

प्रशिक्षक एन्चेलोटीले यसपटक प्रिमियर लिगमा उत्कृष्ट प्रदर्शन गरिरहेका ब्रेन्टफोर्डका स्ट्राइकर इगोर थियागो र बोर्नमाउथका युवा विंगर रायनलाई पहिलोपटक राष्ट्रिय टोलीमा बोलाएका छन् ।

२४ वर्षीय थियागोले यस सिजनमा प्रभावशाली प्रदर्शन गर्दै गोलकर्ताको सूचीमा शीर्ष प्रतिस्पर्धीको रूपमा आफूलाई स्थापित गरेका छन् । सुरुवाती समयमा चोटका कारण कठिनाइ भोगेका उनले पछिल्ला खेलमा भने उत्कृष्ट लय समातेका छन् । क्लबका प्रशिक्षकले पनि उनको प्रगतिलाई महत्वपूर्ण उपलब्धि मानेका छन् ।

त्यसैगरी, १९ वर्षीय रायनले पनि इंग्लिस लिगमा छोटो समयमा नै राम्रो प्रभाव छोड्दै राष्ट्रिय टोलीमा स्थान सुरक्षित गरेका हुन् । उनी हालै ब्राजिलको भास्को डी गामाबाट युरोप पुगेका थिए ।

टोलीमा गालातासरायका मिडफिल्डर गेब्रियल सारा र फ्लेमेन्गोका डिफेन्डर लियो पेरेरा नयाँ अनुहारका रूपमा समावेश भएका छन् । साथै, युवा स्टार एन्ड्रिक एक वर्षपछि पुनः टोलीमा फर्किएका छन् । उनले हालै क्लबस्तरमा डेब्यू खेलमै ह्याट्रिक गर्दै आफ्नो क्षमता देखाएका थिए ।

तर, ब्राजिलका अनुभवी स्टार नेयमार भने यसपटक टोलीमा परेनन् । प्रशिक्षक एन्चेलोटीका अनुसार अझै पूर्णरूपमा फिट नभएकाले उनलाई समावेश नगरिएको हो । लामो समयदेखि राष्ट्रिय टोली बाहिर रहेका नेयमारको विश्वकप सहभागिता अझै अनिश्चित देखिन्छ ।

ब्राजिलले मार्च २६ मा बोस्टनमा फ्रान्ससँग खेल्नेछ भने मार्च ३१ मा ओर्लान्डोमा क्रोएसियासँग प्रतिस्पर्धा गर्नेछ । यी खेलहरू खेलाडीहरूका लागि विश्वकप टोलीमा स्थान बनाउने अन्तिम अवसरका रूपमा हेरिएको छ ।

आगामी विश्वकपमा ब्राजिल समूह ‘सी’ मा मोरक्को, हाइटी र स्कटल्यान्डसँग रहेको छ ।

ब्राजिलका खेल टोलीहरू 

गोलकिपर ः एलिसन (लिभरपुल), बेन्टो (अल–नासर), एडरसन फेनेरबासे)

डिफेन्डर ः एलेक्स सान्ड्रो (फ्लेमेन्गो), ब्रेमर (युभेन्टस), ड्यानिलो (फ्लेमेन्गो), डगलस सान्तोस (जेनिट सेन्ट पिटर्सबर्ग), गेब्रियल म्यागाल्हेस (आर्सनल), इबानेज (अल–अहली), लियो परेरा (फ्लेमेन्गो), मार्किन्होस (पेरिस सेन्ट जर्मेन), वेसले

मिडफिल्डर ः आन्द्रे सान्तोस (चेल्सी), कासेमिरो (म्यानचेस्टर युनाइटेड), डानिलो (बोटाफोगो) फाबिनहो (अल–इत्तिहाद), गेब्रियल सारा (गालारासारे)

फरवार्डहरू ः एन्ड्रिक (लियोन), गेब्रियल मार्टिनली (आर्सनल), इगोर थियागो (ब्रेन्टफोर्ड), जोआओ पेड्रो (चेल्सी), लुइज हेनरिक (जेनिट सेन्ट पिटर्सबर्ग), म्याथियस कुन्हा (म्यानचेस्टर युनाइटेड), राफिनहा (बार्सिलोना), रायन (बोर्नेमाउथ), भिनिसियस जेडर (बार्सिलोना)