विकासको गति सुस्त र सुशासन कमजोर रहँदा देशमा असन्तुष्टि बढ्यो : अर्थमन्त्री खनाल

काठमाडौं । अर्थमन्त्री रामेश्वर खनालले मुलुकमा विकासको गति सुस्त र सुशासनमा रहेका कमजोरीका कारण आम नवयुवा पुस्तामा गहिरो असन्तुष्टि रहेको बताएका छन् ।

आइतबार ललितपुरमा आयोजित एक कार्यक्रममा बोल्दै अर्थमन्त्री खनालले यस्तो बताएका हुन् ।

उनले नवयुवामा देखिएको असन्तुष्टि समय समयमा विभिन्न घटनाक्रममार्फत प्रकट हुँदै आएको उल्लेख गर्दै हालको राजनीतिक परिस्थिति समेत नवयुवाले व्यक्त गरेको असन्तोष र विद्रोहको परिणाम भएको बताए ।

उनले आगामी २१ फागुनमा हुने निर्वाचनमा आम नागरिकले विकासको गति तिब्र बनाउने, सुशासनको अनुभुति दिलाउने तथा स्रोत र सम्पतीमाथिको अतिक्रमण घटाउँदै भ्रष्टाचार नियन्त्रण गर्नसक्ने राजनीतिक शक्तिलाई सत्तामा ल्याउने विश्वास समेत व्यक्त गरे ।

देशमा विकाससम्बन्धी नीति र योजना अभाव नभएको भन्दै उनले पञ्चवर्षीय योजना, दीर्घकालीन रणनीतिक योजना, मन्त्रालयका व्यवसायिक योजना तथा निजी क्षेत्रका योजनामा विकासको स्पष्ट खाका भएपनि कार्यान्वयनमा समस्या रहेको उल्लेख गरे ।

उनले मुलुकको विकास र समृद्धिका लागि बहस नभई व्यवहारमै देखाउनुपर्ने धारणा राखे ।

उनले भने, ‘हाम्रो मुलुकमा विकासको गति सुस्त र सुशासनमा रहेका कमजोरीहरुको कारणले आम नवयुवा पुस्तामा ठूलो असन्तुष्टि छ । त्यो असन्तुष्टि बेला बेलामा प्रकट हुँदै आएको अवस्था पनि छ । अहिले जुन घटनाक्रमले म र मेरा मन्त्रिपरिषद्का मित्रहरुका साथै सम्माननीय प्रधानमन्त्रीज्यु यो मन्त्रिमण्डलमा छौँ त्यो नवयुवाले व्यक्त गरेको विद्रोह र असन्तोषलाई व्यवस्थापन गरेर मुलुकलाई यहाँहरुले आशा गरेको जस्तो विकासको गति दिनसक्ने, आम नागरिकलाई सुशासनको अनुभुति दिनसक्ने तथा स्रोत र सम्पतीमाथिको अतिक्रमणलाई कम गरेर भ्रष्टाचार नियन्त्रण गर्नसक्ने किसिमको राजनीतिक शक्तिलाई सत्तामा ल्याउनको निमित्त आम नागरिकले अगामी फागुन २१ गते निर्वाचनमा सहभागि हुनेछन् । म यत्तिमात्र भन्न चाहन्छु कि म आफैँसँग पनि विकासका शुत्रहरु छैनन् । सम्भवतः हामीले हाम्रा दस्तावेजहरुमा पञ्चवर्षीय योजना, दीर्घकालीन रणनीतिक योजना, मन्त्रालयका विजनेस प्लानहरु र नीजि क्षेत्र आफ्नैको पनि योजनमा विकासको रुपरेखा व्यक्त भएको छ । समस्या हामीकहाँ त्यसलाई कार्यान्वयन गर्ने इच्छाशक्ति, इमादारिता र परिणाम ल्याउनसक्ने व्यवस्थापन छैन । यी तीनवटै कुरा बहस गरेर मात्र प्राप्त हुदैनन् । यो कुरा हामी आफैँले अभ्यास गरेर देखाउनुपर्ने हुन्छ ।’

उनले आसन्न प्रतिनिधि सभा सदस्य निर्वाचनमार्फत मुलुकका समस्याहरुको हल गर्ने रणनीतिक योजना भएको राजनीतिक शक्तिलाई जिताउन समेत आम नागरिकलाई आग्रह गरे ।