शंकर पोखरेल भन्छन्- ‘राजनीतिक विकल्प नाराबाट होइन, नीतिबाट जन्मिन्छ’

काठमाडौं । नेकपा एमालेका महासचिव शंकर पोखरेलले राजनीतिमा नयाँ वा पुराना दलभन्दा पनि एजेण्डा र गन्तव्य महत्त्वपूर्ण हुने बताएका छन् ।  सामाजिक सञ्जाल  फेसबुकमार्फत  आफ्नो धारण व्यक्त गर्दै उनले यस्तो बताएका हुन् । 

उनले लेखेका छन्,‘ राजनीतिमा नयाँ र पुरानो–निरर्थक बहस नेपाललाई समेत बङ्गलादेश जस्तै बनाउन हिडेकाहरु असफल हुँदैगएपछि पुराना पार्टीलाई हराउन नयाँहरू मिल्नुपर्छ भन्ने धारणा अघि सार्न खोज्दैछन्। राजनीतिमा पुरानो र नयाँ भन्नुको कुनै अर्थ हुँदैन । त्यहाँ एजेण्डा र गन्तव्यको विशेष अर्थ र महत्त्व हुन्छ । नीतिविहीन र एजेण्डा विहीनहरूलाई नयाँको पगडी गुथाउँदैमा राजनीतिक विकल्प तयार हुन्छ भन्नु भ्रम मात्र हो ।’

उनले नीति र एजेण्डा नभएकालाई ‘नयाँ’ भनेर प्रस्तुत गर्दैमा राजनीतिक विकल्प नबन्ने बताएका छन्।आफूलाई नयाँ शक्ति भन्ने राष्ट्रिय स्वतन्त्र पार्टी, काठमाडौं महानगरपालिकाका मेयर बालेन्द्र साहलगायत नयाँ देखिएका दल र व्यक्तिहरूबिच गठबन्धनको चर्चा भइरहेका बेला पोखरेलको यो टिप्पणी आएको हो ।

उनले पार्टी पुरानो भए पनि नीति र नेतृत्व समयअनुसार परिवर्तन गर्न सके पार्टी सधैँ सान्दर्भिक रहने बताए। एमालेले नीति र नेतृत्व दुवै क्षेत्रमा निरन्तर सुधार गर्दै आएको उनको दाबी छ ।

उनले लेखेका छन् : राजनीतिमा नयाँ र पुरानो–निरर्थक बहस
नेपाललाई समेत बङ्गलादेश जस्तै बनाउन हिडेकाहरु असफल हुदैगएपछि पुराना पार्टीलाई हराउन नयाँहरु मिल्नुपर्छ भन्ने धारणा अघि सार्न खोज्दैछन्। राजनीतिमा पुरानो र नयाँ भन्नुको कुनै अर्थ हुदैन । त्यहाँ एजेण्डा र गन्तव्यको विशेष अर्थ र महत्व हुन्छ । नीतिविहिन र एजेण्डा विहिनहरुलाई नयाँको पगडी गुथाउदैमा राजनीतिक विकल्प तयार हुन्छ भन्नु भ्रम मात्र हो ।
वास्तवमा पार्टीहरुको इतिहास पुरानो हुन सक्छ, तर नीति र नेतृत्व समयअनुसार अद्यावधिक भइरहँदा पार्टी सधैं जीवन्त र सान्दर्भिक रहन्छन्। त्यसैले लामो इतिहास भएका राजनीतिक दलहरु समेत कहिल्यै ‘पुराना’ हुँदैनन्। किनकी उनीहरु समय अनुसार अद्यावधिक भइरहन्छ । जुन राजनीतिक दल समयअनुकूल चल्न सक्दैनन्, तिनै दलहरु मात्र समाप्त हुन्छन्।नेपाली राजनीतिमा यस्ता दृष्टान्त पर्यप्त छन् ।
तर नेकपा (एमाले) नेपालका राजनीतिक दलहरूमध्ये नीति र नेतृत्वलाई निरन्तर परिमार्जन गर्दै आएको पार्टी हो। यससँग वर्तमान मात्र होइन, भविष्यको नेतृत्व गर्ने स्पष्ट सोच र संकल्प छ। नेकपा (एमाले)को यही जीवन्तता र सान्दर्भिकताबाट डराएकाहरूले नयाँहरु मिल्नुपर्छ भन्ने कुरा उठाइरहेका छन्।
नेपाली राजनीतिका लागि को नयाँ ? रवी, वालेन, हर्क साम्पाङ वा कुलमान ? उनीहरु सबै नेपाली राजनीति र राज्यसत्तामा कुनै न कुनै हिसावले परिक्षण भइसकेका पात्र हुन् । जहाँसम्म जेन्जीका नाममा चर्चित बनेको जेन जेड समुहको सन्दर्भ छ, यो कुनै संगठित शक्ति होइन, यो एउटा उमेर समूह मात्र हो। जो सूचना र प्रविधिको विकाससंग हुर्कियो । यो समूहलाई जननिर्वाचित सत्ताका विरुद्ध प्रयोग गर्न सकिन्छ भन्ने सोच पूँजीवादी साम्राज्यवादीहरु बनाएको सोच हो । डिपस्टेटको अवधारणा जननिर्वाचित सत्ता र जनतामा भिजेका नेताहरुलाई कमजोर बनाउनका लागि षडयन्त्रको सिद्धान्तको प्रयोग गरेर कथित कलर रिभ्युलुसनका नाममा विद्रोहको कोशिस गर्ने गरिन्छ । नेपालका सन्दर्भमा जेन्जी अभियानकर्ताहरुले सुरुगरेको प्रदर्शनमा घुषपैठ गराएर त्यही दिशामा अघि वढाउने कोशिस भइरहेको कुरा साँचो हो ।
तर नेपाली समाज र नेपालका नवयुवाहरुको ठुलो हिस्साले छोटो समयमा त्यस षडयन्त्रलाई वुझ्न सफल भए ।भाद्र २३ को प्रदर्शनका अभियानकर्ताहरुनै अहिले षडयन्त्रका विरुद्धको प्रतिवादका लागि नेकपा(एमाले)को नेतृत्वसंग निरन्तर सम्वादमा छन् । वास्तवमा भन्ने हो भने चौतर्फी घेरावन्दीका वावजुत नवयुवाहरुका बीचमा अहिले पनि नेकपा (एमाले) नयाँ भनिनेहरु भन्दा लोकप्रिय छ ।
पछिल्लो समयमा देशविरुद्ध भइरहेका षड्यन्त्रहरूका वारेमा नवयुवाहरुले जतिजति वुझ्न थालेका छन् उनीहरु त्यतिनै नेकपा(एमाले) प्रति प्रतिवद्ध देखिन थालेका छन् । उनीहरुले नेकपा (एमाले) र यसको नेतृत्व देशका लागि अपरिहार्य रहेको महसुस गर्न थालेका छन्। पछिल्लो समय पुरानाका विरुद्धमा नयाँहरुलाई जसरी पनि मिलाउने कोशिस त्यसकै परिणाम हो । तर अव त्यसको कुनै सान्दर्भिकता देखिदैन ।