अस्ट्रेलियाको वर्नम्बुलमा तीज सांस्कृतिक कार्यक्रम सम्पन्न

काठमाडौं। Warrnambool Nepalese Community ले तीजको अवसरमा सांस्कृतिक कार्यक्रम सम्पन्न गरेको छ। Dennington Bowls Club मा आयोजित कार्यक्रममा वर्नम्बुल, जिलङ, टेराङ, डेनिङटन र ह्यामिल्टनलगायत स्थानबाट करिब सय जनाभन्दा बढी सहभागी भएका थिए।

सन् २०२५ जुनमा दर्ता भएको यस संस्थाले क्षेत्रका नेपाली समुदायलाई एकताबद्ध गर्दै सांस्कृतिक पर्व मनाउने र स्थानीय समाजसँगको सम्बन्ध मजबुत बनाउने उद्देश्य राखेको छ। हाल यस संस्थामा नौ सदस्यीय कार्यसमिति रहेको छ, जसले सांस्कृतिक संरक्षण, समावेशिता र सामुदायिक सहयोगलाई प्राथमिकता दिएको छ।

तीज हिन्दु महिलाहरूको प्रमुख पर्व हो, जसमा व्रत, गीत–नृत्य र भगवान् शिव–पार्वतीको पूजा गरी वैवाहिक सुख–समृद्धि र दीर्घायुका लागि प्रार्थना गरिन्छ। यस पटकको उत्सवमा पनि महिलाहरूले परम्परागत भेष भूषामा नाचगान, भजन र सामूहिक भोजमा सहभागी भई उत्सवलाई रमाइलो बनाए। यसअघि विभिन्न घरमा साप्ताहिक भजन–कीर्तनसमेत आयोजना गरिँदै वातावरण तयार गरिएको थियो।

उक्त कार्यक्रममा संस्थाका अध्यक्ष दीपेश बास्कोटाले सहभागी सबैलाई धन्यवाद ज्ञापन गर्दै विशेष गरी स्वैच्छिक सहयोग पुर्‍याउने स्वयंसेवकप्रति कृतज्ञता व्यक्त गरे। उनले भने, “हाम्रो सामूहिक प्रयासकै कारण आजको कार्यक्रम सम्भव भयो। यो समुदायका लागि महत्त्वपूर्ण सुरुवात हो।” साथै उनले आगामी दिनमा अझ धेरै सदस्यलाई समितिमा जोडिन आह्वान गरे।

उपाध्यक्ष मोहन बमले पनि कार्यक्रममा सबैको योगदानको प्रशंसा गर्दै भने, “यो हाम्रो टिमको साझा उपलब्धि हो। अब हामीले आधारभूत ढाँचा तयार गरिसकेका छौँ, दक्षिण–पश्चिम भिक्टोरियामा अझ धेरै सांस्कृतिक तथा सामुदायिक गतिविधि सञ्चालन गर्ने लक्ष्य छ।”

भविष्यमा यस संस्थाले अन्य सांस्कृतिक पर्व, शैक्षिक कार्यक्रम र सामाजिक पहलहरू आयोजना गर्ने योजना बनाएको छ, जसले नेपाली पहिचानलाई जोगाउने मात्र नभई दक्षिण–पश्चिम भिक्टोरियाको विविधतामा पनि सार्थक योगदान पुर्‍याउने आयोजकहरूको भनाइ छ।