छाउगोठमा सुतेकी युवतीको सर्पले डसेर मृत्यु

काठमाडाैं । कञ्चनपुरको कृष्णपुर नगरपालिका–१ निगालीमा छाउगोठमा सुतिरहेकी २८ वर्षीया कमला आउजीको सर्पको टोकाइबाट मृत्यु भएको छ ।

शनिबार राति करिब १२:३० बजे बायाँ गालामा सर्पले टोकेपछि गम्भीर घाइते भएकी आउजीको उपचारका क्रममा सेती प्रादेशिक अस्पताल, धनगढीमा निधन भएको जिल्ला प्रहरी कार्यालयका प्रवक्ता डीएसपी सागर बोहराले जानकारी दिए ।

भारतमा रहेका श्रीमान् र तीन सन्तानकी आमासमेत रहेकी आउजी महिनावारीका कारण छाउगोठमा सुतिरहेकी थिइन् ।

सुदूरपश्चिममा छाउपडी कुप्रथाविरुद्ध अभियान चलिरहेका भए पनि अझै पूर्ण रूपमा अन्त्य भइनसकेको अवस्थाले फेरि एक दुःखद घटना घटाएको हो ।