भोको पेटमा लिची नखाएकै राम्रो

काठमाडौं । के लिची स्वास्थ्यको लागि हानिकारक छ ? सोझो जवाफ छ, हानिकारक छैन । तर यसको ज्यादा सेवन भने निषेध गरिएको छ ।

अहिले लिचीको समय हो, बजारमा जताततै लिची पाईन्छ । लिची मन पराउने मध्ये धेरै मानिसहरू विश्वास गर्छन्, लिचीले हाम्रो कलेजोलाई हानि पु-याउन सक्छ । उनीहरुलाई लाग्छ लिचीले शरीरको डिटक्सिफाइ गर्ने क्षमतालाई कम गर्छ ।

के यो सत्य हो त ? 

विशेषज्ञहरु यसमा सहमत छैनन् । लिची प्रायः शरीरको आन्तरिक ताप बढाउन कारक हुन्छ । परम्परागत विश्वास अनुसार कलेजोको कार्यलाई हानि पु-याउनेसँग जोडिएको हुन्छ । यद्यपि, लिचीले प्रत्यक्ष रूपमा कलेजोलाई हानि गर्दैनन् वा कलेजोको डिटक्सिफाइ गर्ने क्षमतालाई घटाउँदैन ।

भियतनामको हनोई ओरिएन्टल चिकित्सा संघका डा. बुई ड्याक साङका अनुसार, लिचीकाे पानीमा, ग्लुकोज, प्रोटिन र फ्याटको मात्रा भरपूर भएकोले स्वास्थ्यमा सकारात्मक योगदान पु-याउछ । लिचीमा फाइबरको मात्रा उच्च स्तर हुन्छ र क्यालोरीकाे मात्रा कम हुन्छ, जसले पाचन प्रणलीलाई सजिलो बनाउन मद्दत गर्दछ । तौल व्यवस्थापनलाई समेत सहयोग पु-याउने गर्छ ।

लिचीमा पाइने एन्टिअक्सिडेन्ट र भिटामिन सीले कालो दागहरू कम गर्न, बुढ्यौलीका लक्षणहरू रोक्न र रोग प्रतिरोधात्मक क्षमता बढाउन मद्दत गरेर छालाको स्वास्थ्यलाई रक्षा गर्छ । गर्मी समयमा ५ देखि ६ वटा लिचीको सेवन गर्न सुझाव चिकित्सकहरुले दिएका छन् । मधुमेहका रोगीहरूले विशेष रूपमा सावधानी अपनाउनुपर्छ र दैनिक ६ वटाभन्दा बढी लिचीको उपभोग गर्नुहुँदैन ।

बच्चाहरू प्रायः लिचीको मीठो स्वाद मन पराउँछन्, तर अधिक तौल र तातो दाग जस्ता समस्याहरू रोक्नको लागि तिनीहरूको उपभोगको निगरानी गर्न आवश्यक छ । गर्भवती महिलाहरूले पनि आफ्नो सेवन मध्यम र यो फलको खपत सीमित गर्नुपर्छ ।   खाली पेटमा लिचीहरू उपभोग गर्नबाट बच्न सुझाव दिइएको छ ।