काठमाडौं । पार्टीभित्रको आन्तरिक विवाद नसुल्झिएपछि स्थायी कमिटि बैठक रोकेर सत्तारुढ नेपाल कम्युनिस्ट पार्टी (नेकपा)ले डाकेको सचिवालय बैठक शुरु भएको छ । बैठकमा प्रधानमन्त्री केपी शर्मा ओलीसहित सचिवालयका ९ जना नै सदस्य सहभागी छन् ।
हिजो (शुक्रवार) बोलाइएको स्थायी कमिटि बैठक चार घण्टा पर सारेर पार्टीका अध्यक्षद्वय ओली र पुष्पकमल दाहाल प्रचण्डबीच सचिवालय बैठक आजको लागि डाक्ने गरि स्थायी कमिटि पनि रोकिएको थियो । सचिवालय बैठक अघि अध्यक्षद्वयबीच भेटवार्ता भएको थियो ।
गत बैशाखदेखि उत्कर्षमा पुगेको नेकपाको विवाद समाधानको लागि दुई अध्यक्षबीच पटक पटक भेटवार्ता भएको छ । त्यतिमात्र होइन दुई अध्यक्षले साक्षी राखेर समेत वार्ता गर्दापनि सहमती नजुटेपछि अन्तत स्थायी कमिटि रोकेरै नेकपाले सचिवालय बैठक डाकेको हो ।
गत असार १० गतेबाट जारी नेकपा स्थायी कमिटि बैठक पटक पटक अन्तिम समयमा आएर स्थगित हुने गरेकोमा स्थायी कमिटि सदस्यसमेत पार्टी अध्यक्षसँग रुष्ट बनेका छन् । पार्टी नै फुटको संघारमा पुगेपछि जनतालाई मुख देखाउन नसकिने नैतिक संकट पर्ने तर्फ सचेत गराउँदै स्थायी कमिटि सदस्यहरुले दुई अध्यक्षहरुलाई समय दिएका थिए । तर हरेक भेटमा प्रचण्ड राजिनामा माग्ने ओलीले पुरानै अडान दोहोर्याउने शिलशिला जारी रहेपछि अन्तत नेकपाको विवाद केन्द्रीय कमिटि बैठक राखेर टुंग्याउने सम्मको सहमती भएको थियो ।
तर हिजो अचानक स्थायी कमिटि बैठक अघि बसेको अध्यक्षद्वयको वार्ता लम्बियो र निष्कर्ष सचिवालय बैठकमा नै फर्किने सहमती भयो । आजको बैठकपछि साउन ४ गते अर्थात आइतवार(भोली) बस्ने स्थायी कमिटि बैठकलाई सुचारु गर्न सहज हुने विश्वास नेकपाका नेताहरुले लिएका छन् ।
सचिवालयका एक सदस्यले लोकपथसँग भने, “जुनसुकै विकल्पमा पनि ओली तयार नभएपछि समस्या जहाँको तहीँ छ । केन्द्रीय कमिटिमा पार्टीको शक्ति समिकरणको विषय लैजानु पनि तत्काललाई पार्टी अध्यक्ष र प्रधानमन्त्रीको पदबाट टसमस नगर्ने ओलीको चाल हो । “
यो खबर पढेर तपाईलाई कस्तो महसुस भयो ?
प्रतिक्रिया