स्पेनको अवस्था भयावह : २४ घण्टामा ७१८ जनाको मृत्यु, १ दिनमा १६ हजार अमेरिकी संक्रमित

काठमाडौं । कोरोना भाइरसका कारण अहिले सारा विश्वमा हाहाकार मच्चिएको छ । दिनमै हजारको संख्यामा भाइरसका कारण मृत्यु भईरहेको छ ।

कोरोना भाइरसका कारण सारा विश्वमा अहिलेसम्म ५ लाख ४९ हजार ३ सय २४ जना संक्रमित भएका छन् भने २४ हजार ८७२ जनाको मृत्यु भईसकेको छ ।

नेपालमा पनि ३ जनामा कोरोनाको संक्रमण देखा परेको छ । अहिले सम्म संक्रमित एक जना उपचार पछि घर फर्किइसकेका छन् भने अन्य दुई जनाको टेकुमा उपचार भईरहेको छ ।

स्पेनमा तीव्र गतिले फैलिँदै कोरोना

युरोपीय देश स्पेनमा कोरोनाले लगातार अत्याधिक मानिसहरुको ज्यान लिइरहेको छ ।

बिहीवार मात्रै स्पेनमा सबैभन्दा धेरै ७ सय १८ जनाको निधन भएको थियो । स्पेनमा अहिलेसम्म भाइरुसबाट मर्नेको संख्या ४ हजार ८ सय ५८ जनाको मृत्यु भएको छ भने ६४ हजार ५९ जनामा कोरोनाको संक्रमण देखा परेको छ ।

इटालीमा ८ हजार भन्दा धेरैको मृत्यु

युरोपीय देश इटालीमा कोरोना भाइरसको प्रभाव सबैभन्दा धेरै परेको छ । कोरोनाका कराण इटालीमा अहिलेसम्म ८ हजार २ सय ५१ जनाको मृत्यु भएको छ ।

साथै पछिल्लो २४ घण्टामा इटालीमा भाइरसबाट मर्नेको संख्या ६ सय ३८ पुगेको छ । र इटालीमा आज मात्रै ६हजार २ सय ३ जनामा कोरोनाको संक्रमण देखा परेको छ ।

ईटालीमा कोरोना भाइरसको संक्रमण हुनेको संख्या ८० हजार ५ सय ८९ पुगेको छ ।

अमेरिकामा एकै दिनमा १६हजार मानिस संक्रमित

अमेरिकामा कोरोना भाइरसका संक्रमितहरु अहिलेसम्मकै उच्च रहेको छ । गएको २४ घण्टामा कोरोना संक्रमितहरु अमेरिकामा १६ हजारले बढेका छन् ।

कोरोना भाइरसका कारण अमेरिकामा अहिलेसम्म १३ सय ४ जनाको मृत्यु भएको छ भने ८५ हजार ७ सय ४९ जनामा कोरोनाको संक्रमण देखा परेको छ ।

एजेन्सीको सहयोगमा