एकैदिन भारतबाट १७ हजारभन्दा बढी नेपाली फर्किए

धनगढी। सुदूरपश्चिम प्रदेशमा रहेको दुई मुख्य नाकाबाट एकै दिन १७ हजारभन्दा बढी नेपाली स्वदेश फर्किएका छन् ।
छिमेकी राष्ट्र भारतको विभिन्न राज्यमा कोरोना भाइरस (कोभिड–१९) को सङ्क्रमण फैलिदैं गएपछि त्यहाँ रहेका नेपाली धमाधम घर फर्किन लागेका हुन । शनिबारमात्रै कञ्चनपुरको गड्डाचौकी नाकाबाट १३ हजार र कैलालीको त्रिनगर भन्सार नाकाबाट चार हजार नेपाली स्वदेश फर्केका छन् ।
विहानै दुवै नाकामा अत्यधिक नेपाली पुगेपछि उनीहरुलाई चेकजाँच गरेर मुलुकभित्र आउन दिन हम्मे–हम्मे भएको थियो । नाकामा स्थापना भएका हेल्थ डेस्कमा कार्यरत स्वास्थ्यकर्मीलेमात्रै चेकजाँच गर्न सम्भव नभएपछि तत्काल दुवै नाकामा नेपाली सेनालेसमेत हेल्थ डेस्क स्थापना गरेर भारतबाट फर्किनेहरुको स्वास्थ्य चेकजाँच गरेको थियो ।गोरखापत्रमा खबर छ।