काठमाडौं । नेपालका औषधि उत्पादकहरूले देशको औषधि उद्योग संकटमा परेको भन्दै सरकारले आयातमा कडाइ गर्नुपर्ने माग गरेका छन् ।
नेपाल औषधि उत्पादक सङ्घ (एपोन) का पदाधिकारीहरूका अनुसार नेपालमा करिब १०० औषधि उद्योग दर्ता भए पनि धेरै उद्योग बन्द भइसकेका छन् भने केही बन्द हुने अवस्थामा पुगेका छन् । हाल सञ्चालनमा रहेका उद्योग पनि पूर्ण क्षमतामा होइन, करिब ३० देखि ४० प्रतिशत मात्र चलिरहेका छन् ।
उद्योगीहरूको भनाइमा विदेशी औषधि सस्तो पर्ने भएकाले नेपाली उत्पादनले प्रतिस्पर्धा गर्न सकेको छैन । विशेषगरी भारतलगायत देशबाट आउने औषधिले बजार ओगट्दा स्थानीय उद्योग कमजोर बनेको उनीहरूको दाबी छ ।
उनीहरूले सरकारले नेपालमै उत्पादन हुने औषधिको आयात घटाएर कच्चा पदार्थ मात्र आयात गर्न दिने नीति ल्याउनुपर्ने सुझाव दिएका छन् । साथै उद्योगका लागि आवश्यक उपकरण, प्याकेजिङ सामग्री र नयाँ प्रविधिमा भन्सार छुट दिनुपर्ने माग पनि गरिएको छ ।
उद्योगीहरूका अनुसार नेपालले आफ्नो आवश्यक औषधिको करिब ८० प्रतिशतसम्म स्वदेशमै उत्पादन गर्न सक्ने क्षमता भए पनि अहिले उत्पादन क्षमताको ठूलो हिस्सा प्रयोग हुन सकेको छैन ।
उनीहरूले बैंक ब्याजमा सहुलियत, कर प्रणालीमा सुधार र सरकारी सहजीकरण भएमा औषधि उद्योगलाई बचाउन र विस्तार गर्न सकिने बताएका छन् ।
हाल नेपालमा औषधि बजारको आकार वार्षिक करिब सात अर्ब रुपैयाँ बराबर रहेको अनुमान छ, जसमा आधा हिस्सा मात्रै स्वदेशी उत्पादनले ओगटेको छ ।
यो खबर पढेर तपाईलाई कस्तो महसुस भयो ?
प्रतिक्रिया