अनामनगरमा सार्वजनिक जग्गा अतिक्रमण हटाउने अभियान आज पनि जारी, बिहानैदेखि प्रहरी परिचालन

काठमाडौं । सरकारले अनामनगर क्षेत्रमा सार्वजनिक जग्गा अतिक्रमण गरी निर्माण गरिएका संरचनाहरू भत्काउने अभियानलाई आज पनि निरन्तरता दिने भएको छ ।

शनिबार सोही क्षेत्रमा डोजर प्रयोग गरी अवैध संरचनाहरू भत्काइएको थियो । आइतबार पनि अभियान जारी रहने भएपछि उक्त क्षेत्रमा सुरक्षा व्यवस्था कडा पारिएको छ । बिहानैदेखि ठूलो संख्यामा प्रहरी परिचालन गरिएको छ ।

सरकारले यसअघि शुक्रबार बल्खु र कालिमाटी क्षेत्रमा नदी किनारमा बनेका सुकुमबासी बस्ती हटाएको थियो । ती स्थानहरूमा पनि डोजर प्रयोग गरी संरचना हटाइएको थियो ।

महानगर प्रहरीका अनुसार हालसम्म काठमाडौं उपत्यकामा सरकारी, सार्वजनिक तथा निजी जग्गा अतिक्रमण गरी बनाइएका करिब दुई हजारभन्दा बढी घरटहरा हटाइसकिएको छ ।

अतिक्रमण हटाउने अभियानलाई निरन्तरता दिने सरकारी तयारीसँगै प्रभावित क्षेत्रमा स्थानीयवासीको चासो र सुरक्षा संवेदनशीलता बढेको छ ।