आलमविरुद्धको मुद्दामा आजबाट सुनुवाइ हुने, पेशी तोकियो

काठमाडौं । नेपाली कांग्रेसका नेता एवं पूर्वमन्त्री मोहमद अफताब आलमविरुद्धको मुद्दामा पेसी तोकिएको छ ।

लामो अन्यौलतापछि रौतहट जिल्ला अदालतले आलमको मुद्दाको पेशी तोकिएको हो ।

आजबाट निरन्तर सुनुवाइ हुने गरी आलम लगायतका ११ जनाविरुद्ध दायर भएको विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यान सम्बन्धी कसुरमा अन्तिम सुनुवाइका लागि पेसी तोकिएको हो ।

रौतहट जिल्ला अदालतका न्यायाधीश न्यायाधीश मातृकाप्रसाद आचार्यको इजलासमा पेशी तोकिएको हो ।

गत कात्तिक २२ गते न्यायाधीश बाबुकाजी बानियाको इजलासले बहस नोट माग गर्ने आदेश दिएको थियो । त्यसपछि मङ्सिर २४ गतेभित्रै वादी नेपाल सरकार र प्रतिवादी तर्फका कानुन व्यवसायीले बहस नोट बुझाएको भए पनि अदालतले सुनुवाइको मिति तोकेको थिएन । सर्वोच्च अदालतबाट समेत उक्त मुद्दामा चासो राख्दै मुद्दा छिटो टुङ्ग्याउन दबाब दिएपछि रौतहट जिल्ला अदालतले गत पुस २९ गते आइतबारका लागि उक्र मुद्दाको पेसी तोकेको थियो । तर उक्त दिन दिन न्यायाधीश अभावका कारण गोला नतानिएपछि स्थगितको सूचीमा राखिएको थियो ।