सर्वाधिक ठूलो मुख भएकी महिला

टिकटकमा भाइरल भएकी एक महिलाले हालै सर्वाधिक ठूलो मुख भएको महिलाको रूपमा आफ्नो नाम गिनेज बुक अफ वर्ल्ड रेकर्ड्समा लेखाउन सफल भएकी छिन् । यो कीर्तिमान् कायम गर्न उनले मुख ठुलो बनाउन कुनै किसिमको शल्यक्रिया नगरेको भन्ने कुरा प्रमाणित गर्नु परेको थियो ।

अमेरिकाको स्यामफोर्ड, कनेक्टिकटमा बस्दै आएकी ३१ बर्षिया सामन्था राम्सडेलले आफ्नो मुख खोल्दा २ दशमलव ५६ इन्च फराकिलो बनाउन सकेपछि गत वर्ष देखि उनी सामाजिक सञ्जालमा भाइरल भएकी थिइन् । उनको यो अद्भुत प्रतिभाको कदर गर्दै हालै गिनेज बुक अफ वर्ल्ड रेकर्डस्ले सर्वाधिक ठुलो मुख भएकी महिलाको कीर्तिमान् उनको नाम दर्ता गरेको छ ।

औषधी बिक्री प्रतिनिधिको रूपमा कार्यरत सामन्थाले आफ्नो मुख सर्वाधिक ठुलो खोलिने थाहा पाएपछि पछिल्लो ६ महिना देखि उनी गिनेज बुकमा नाम लेखाउन अग्रसर भएकी थिइन् । गिनेज बुकमा नाम लेखाउने प्रक्रिया निकै लामो रहेछ सामन्थाले भनिन् । आफ्नो मुख प्राकृतिक रूपमा ठुलो रहेको कुरा उनले प्रमाणित गर्नुपरेको थियो ।

गिनेज बुकका प्रतिनिधिहरूले आफूले कुनै किसिमको शल्यक्रिया गरेर बनाएको हो कि वा कुनै रोग विशेषको कारण भएको हो भन्ने कुराको परीक्षण र सोधपुछ गरेको उनी बताउँछिन् । आफूले पहिलो पटक आफ्नो मुख ऐनामा हेर्दा ठुलो देखेपछि उनले आफ्नो मुख पक्कै पनि अरूको भन्दा धेरै ठुलो भएको महसुस गरेकी थिइन् ।

आफ्नो मुख अद्भुत भएपछि उनले सन् २०१९ मा टिकटकमा एकाउन्ट खोलेर आफ्नो प्रतिभा देखाउन थालिन् त्यो बेलामा ३ सय जना मात्र फलोअर्स रहेको उनको एकाउन्टमा अहिले १७ लाख फलोअर्स रहेका छन् । सन् २०२० मा कोभिडको प्रकोप बढेपछि उनको भिडियोहरूले लोकप्रियता पाउन थालेको उनी बताउँछिन् । कुनै समय त कस्तो पनि देखियो भने एकै महिनामा उनको एकाउन्टमा ५ लाख फलोअर्स बढेको थियो । अहिले सामन्थाले कसैको एउटा भिडियो आफ्नो एकाउन्टमा बनाउँछिन् भने उनले १८ लाख रूपैंया भन्दा बढी पारिश्रमिक लिने गरेकी छिन् ।