झापा । चाडबाडका समयमा ग्यास तथा पेट्रोलियम पदार्थको कृत्रिम अभाव हुन नदिन झापा प्रशासनले आपूर्ति तथा वितरण प्रणालीको नियमित अनुगमनमा जोड दिएको छ ।
प्रमुख जिल्ला अधिकारी श्रवणकुमार पोखरेलले चाडबाडका बेला उपभोग्य वस्तुको माग बढ्न सक्ने भएकाले आपूर्ति व्यवस्थालाई चुस्त र व्यवस्थित बनाउन सम्बन्धित निकायलाई आग्रह गरेका छन् ।
उनले जिल्लामा ग्यासलगायत पेट्रोलियम पदार्थको आपूर्ति अवस्थाबारे समीक्षा गर्दै उपभोक्तालाई सहज रूपमा इन्धन उपलब्ध गराउन आवश्यक समन्वय गर्नुपर्नेमा जोड दिए ।
नेपाल आयल निगम चारआलीका प्रमुख उमेशकुमार पोखरेलका अनुसार झापामा पेट्रोलियम पदार्थको अभाव छैन ।
त्यस्तै, पराजुली ग्यास उद्योगका सञ्चालक जितबहादुर कार्कीका अनुसार झापामा दैनिक पाँच हजार ५०० सिलिन्डर ग्यासको माग रहेकामा हाल सात हजार ६०० सिलिन्डर उत्पादन भइरहेको छ । पछिल्लो दुई महिनामा नियमित खपतको तुलनामा करिब ४० प्रतिशत बढी ग्यास बजारमा खपत भएको उनले बताए ।
चाडबाडका समयमा नियमित आपूर्ति सुनिश्चित गर्ने विषयमा मंगलबार जिल्ला प्रशासन कार्यालयमा छलफल भएको थियो । छलफलमा सुरक्षा निकाय, नेपाल आयल निगम, पेट्रोलियम डिलर्स एसोसिएसन तथा ग्यास विक्रेता सङ्घका प्रतिनिधिहरू सहभागी थिए ।
यो खबर पढेर तपाईलाई कस्तो महसुस भयो ?
प्रतिक्रिया