काठमाडौं । नेपाली कांग्रेसका नेता एवं सांसद अर्जुननरसिंह केसीले मुलुकमा आइलागेको प्राकृतिक विपत्तिको सामना गर्न सरकारले सबै पक्षसँग सहकार्य र संवाद गर्नुपर्नेमा जोड दिएका छन् ।
संघीय संसद भवनबाहिर सञ्चारकर्मीहरूसँग कुरा गर्दै नेता केसीले राहत वितरण र उद्धार कार्यमा सरकारको कार्यक्षमतामाथि प्रश्न उठाएका हुन् ।
सांसद केसीले राष्ट्रिय विपत्तिको यस घडीमा सत्तापक्ष र प्रतिपक्ष नभनी सहमति र संवादमार्फत समाधान खोज्नुपर्ने बताए ।
सरकारले राहत वितरणमा प्रभावकारिता देखाउन नसकेको उल्लेख गर्दै उनले त्रिशूली पारि रसुवा लगायतका क्षेत्रमा अझै राहत पुग्न नसकेको दाबी गरेका छन् ।
विशेषगरी सिमलताल लगायतका क्षेत्रमा भएको दुर्घटना र सुरुङमा फसेकाहरूको उद्धारमा सरकारले ढिलाइ गरेको उनको आरोप छ ।
उनले भने, ‘अहिलेको यो राष्ट्रिय संकटमा हामी कोही सत्तापक्ष वा प्रतिपक्ष होइनौँ । विवादभन्दा संवाद र विमतिभन्दा सहमतिद्वारा बाटो खोज्नुपर्छ भन्ने हाम्रो दृष्टिकोण हो । सुरुङमा समयमै विदेशी प्राविधिकहरूको सहयोग लिएको भए धेरै मानिसको ज्यान जोगाउन सकिने स्थिति हुन्थ्यो । यसमा सरकारको गम्भीर कमजोरी देखिएको छ । सरकारमा संवादको मानसिकता देखिएको छैन । एक्लै गर्न सकिन्छ भन्ने अहं त्यागेर विदेशी प्राविधिकको सहयोग लिने र सम्पूर्ण राजनीतिक दलहरूसँग सहकार्य गरेर अगाडि बढ्नुपर्ने आजको आवश्यकता हो ।’
बाढी र पहिरोको प्रकोपलाई ‘हिमाली सुनामी’को संज्ञा दिँदै उनले रसुवा र नुवाकोट क्षत–विक्षत भएको तथा धादिङ, गोरखा र चितवनका केही भागमा समेत ठुलो क्षति पुगेको जानकारी दिए । सरकारले एक्लै सबै काम गर्न सकिन्छ भन्ने मानसिकता त्याग्नुपर्ने सुझाव दिए ।
यो खबर पढेर तपाईलाई कस्तो महसुस भयो ?
प्रतिक्रिया