कांग्रेस संस्थापन इतर समूहको राष्ट्रिय भेलाको दोस्रो दिन के-के हुँदै छ ?

काठमाडौं । नेपाली कांग्रेसको संस्थापन इतर समूहले आयोजना गरेको तीन दिने राष्ट्रिय भेलाको दोस्रो दिन आज विभिन्न प्रतिवेदनमाथि छलफल सुरु भएको छ ।

काठमाडौंको सुकेधारास्थित मिराकल पार्टी भेन्यूमा भइरहेको बन्दसत्रमा पार्टीको आन्तरिक अवस्था, संगठन र आगामी राजनीतिक रणनीतिबारे छलफल भइरहेको छ ।

भेलामा पूर्वउपसभापति विमलेन्द्र निधिले राजनीतिक प्रतिवेदन, एनपी साउदले समसामयिक राजनीतिक प्रतिवेदन, डा. प्रकाशशरण महतले आर्थिक प्रतिवेदन, उमाकान्त चौधरीले सांगठनिक प्रस्ताव र रमेश लेखकले विधान संशोधन प्रस्ताव प्रस्तुत गरेका छन् ।

प्रचारप्रसार समितिका संयोजक मीन विश्वकर्माका अनुसार सहभागी नेता तथा कार्यकर्ताले समूह बनाएर प्रतिवेदनमाथि छलफल गर्ने र सुझाव दिनेछन् ।

शुक्रबार पूर्वसभापति शेरबहादुर देउवाको प्रमुख आतिथ्यमा र पूर्वमहामन्त्री शशांक कोइरालाको अध्यक्षतामा भेलाको उद्घाटन गरिएको थियो ।

विशेष महाधिवेशनपछि कांग्रेसभित्र देखिएको आन्तरिक विवादका बीच आयोजना भएको यो भेलालाई संस्थापन इतर समूहको शक्ति प्रदर्शनका रूपमा पनि हेरिएको छ ।

भेलाले सहभागीका सुझाव समेटेर घोषणापत्र जारी गर्दै आइतबार समापन हुनेछ ।