काठमाडौं । पोखरा महानगरपालिकाले न्युरोड क्षेत्रका फुटपाथ (सडकपेटी) मा हुने अनधिकृत पार्किङ हटाउने अभियानलाई तीव्रता दिएको छ ।
महानगरको वडा नम्बर ८ र ९ अन्तर्गत पर्ने न्यूरोड क्षेत्रमा पैदलयात्रीको सहजताका लागि सडकपेटी खाली गराउन थालिएको हो ।
नगर प्रहरी निरीक्षक पुरुषोत्तम थापाकाअनुसार फुटपाथ पैदलयात्रीका लागि मात्र भएकाले त्यहाँ सवारी साधन पार्किङ गर्दा आवागमनमा अवरोध पुग्ने र दुर्घटनाको जोखिम बढ्ने हुँदा यो कदम चालिएको हो ।
उनले महानगरपालिकाले तोकेका निश्चित स्थानहरूमा मात्र पार्किङ गर्न र अन्य क्षेत्रमा सवारी धनी स्वयंले व्यवस्थापन गर्नुपर्ने स्पष्ट पारे ।
महानगरले यो अभियान सुरु गर्नुअघि गत शुक्रबारदेखि आइतबारसम्म तीन दिन लगातार माइकिङ गरी नगरबासीलाई यसबारे जानकारी गराएको थियो । सूचनाको अवज्ञा गर्ने सवारी साधनमाथि आजदेखि कारबाही सुरु गरिएको छ ।
सोमबार मात्रै फुटपाथमा पार्किङ गरिएका ८ वटा मोटरसाइकल नियन्त्रणमा लिइएको नगर प्रहरीले जनाएको छ ।
उनले भने, ‘फुटपाथ बाइक राख्ने ठाउँ होइन, यो पैदलयात्रीका लागि बनाइएको हो ।
महानगरले न्यूरोडका केही स्थानमा पार्किङको व्यवस्था गरेको छ, त्यहीँ पार्किङ गर्नुपर्छ । दीर्घकालीन पार्किङको व्यवस्था नभएसम्म फुटपाथलाई भने पूर्ण रूपमा खाली राखिनेछ ।’ नगर प्रहरी निरीक्षक थापाले मंगलबारदेखि थप कडाइ गरिने बताए ।
अबका दिनमा फुटपाथमा पार्किङ गरिएको पाइएमा सवारी धनीलाई तत्काल सवारी साधन नबुझाइने र ती साधन नियन्त्रणमा लिएर जिल्ला ट्राफिक प्रहरी कार्यालय पठाई नियमानुसार कडा कारबाही गरिने उनको भनाइ छ ।
महानगरले सडकपेटी खाली गराई सडकमा हुने चाप र सम्भावित दुर्घटना न्यूनीकरणमा सहयोग पुर्याउन सम्पूर्ण सवारी धनी तथा नगरबासीलाई आग्रह गरेको छ ।
यो खबर पढेर तपाईलाई कस्तो महसुस भयो ?
प्रतिक्रिया