काठमाडौं । संसदीय सुनुवाई समितिले सर्वोच्च अदालतको प्रधानन्यायाधीशमा सिफारिस भएका डा. मनोजकुमार शर्माविरुद्ध शर्माविरुद्ध उजुरी आह्वान गरेको छ ।
शुक्रबार सिंहदरबारमा बसेको समितिको बैठकले शर्माविरुद्ध उजुरी आह्वान गरेको हो ।
यसअघि बिहीबार बसेको संवैधानिक परिषद्को बैठकले शर्मालाई प्रधानन्यायाधीशमा नियुक्त गर्न सिफारिस गरेको थियो ।
समिति सभापति बोधनारायण श्रेष्ठले शर्माविरुद्ध कुनै उजुरी भए १० दिनभित्र कार्यालयको ठेगानामा पत्राचार गर्न वा सोझै समितिको सचिवालयमा वा कुनैपनि जिल्ला प्रशासन कार्यालयमार्फत उजुरी दिनसक्ने गरी ब्यवस्था मिलाएको बताए । उनले उजुरी नामसहित वा बेनामे उजुरी समेत दिन सकिने व्यवस्था गराइएको बताए ।
उनले शर्माविरुद्ध शनिबारदेखि अगामी जेठ ४ गतेसम्म उजुरी संकलन गरिने र त्यसपछि उजुरीहरुको अध्ययनपश्चात सुनुवाइ प्रक्रिया अगाडि बढाइने बताए ।
उनले भने, ‘संवैधानिक परिषद्बाट हामीलाई सर्वोच्च अदालतको प्रधानन्यायाधीशमा मााननीय डा। मनोजकुमार शर्माको नाम सिफारिस भई आयो । र यो बैठकको आयोजना भएको हो । बैठकबाट हामीले १० दिनको समय राखेर शनिवारदेखि जेठको ४ गतेसम्म उहाँको विरुद्धमा उजरीहरु संकलन गर्ने अवधी तोकेका छौँ । यो बीचमा समितिको सचिवालयमा सिधै उजुरी दर्ता गर्न सकिनेछ । साथै विद्युतीय माध्यमबाट समेत उजुरीहरु पठाउन सकिनेछ । प्रमुख जिल्ला अधिकारीमार्फत समेत उजुरी पठाउन सकिने व्यवस्था गरेका छौँ । नाम किटान गरेर र बेनामे उजुरी समेत पठाउन सकिनेछ । तर बेनामे उजुरीमा प्रमाणसहित पठाउने भनेका छौँ । जेठ ५ गतेदेखि उजुरीहरुको छानिवन प्रक्रिया शुरु गर्छौँ ।’
प्रधानन्यायाधीशमा सिफारिस भएका शर्मा संसदीय सुनुवाई समितिबाट अनुमोदन भई प्रधानन्यायाधीशमा नियुक्त भएमा ६ वर्षे पूरा कार्यकाल पूरा गर्न पाउनेछन् । शर्मा संसदीय सुनुवाई समितिबाट पनि अनुमोदन भए २०८९ वैशाखसम्म सर्वोच्चको नेतृत्व सम्हाल्नेछन् ।
यो खबर पढेर तपाईलाई कस्तो महसुस भयो ?
प्रतिक्रिया