गरिखाने नागरिकमाथि दमन नगर्न सरकारलाई हर्क साम्पाङको सुझाव

काठमाडौं । श्रम संस्कृति पार्टीका अध्यक्ष हर्कराज राईले सरकारले सडकमा व्यवसाय गरिरहेका नागरिकमाथि विकल्प नदिई धरपकड गर्नु गलत भएको बताएका छन् ।

मंगलबार काठमाडौंमा आयोजित पत्रकार सम्मेलनमा बोल्दै उनले गरिखाने नागरिकलाई जीविकोपार्जनका लागि अवसर नदिई घाँटीमा न्याँक्ने र धरपकड गर्ने काम भइरहेको भन्दै आपत्ति जनाए ।

राईले सडकमा सानो व्यवसाय गरेर जीवन चलाइरहेका नागरिकलाई हटाउँदा विकल्प दिनुपर्नेमा जोड दिए । उनले यस्तो कार्यले अपराधका घटनामा वृद्धि हुने दाबी गरे ।

‘नागरिकलाई घाँटीमा न्याँकेको जस्तो देखिन्छ, घोक्र्याउने, मुन्ट्याउने काम भइरहेको छ,‘ राईले भने, ‘सडकमा सानो व्यवसाय गरेर खान खोजिरहेकालाई हटाइयो भने उनीहरू कहाँ जाने ? भोक लागेपछि नियम मान्दैन, त्यसपछि अपराधतर्फ जान सक्छन् ।’

उनले सरकारलाई हरेक निर्णय गर्दा दीर्घ सोच राखेर अघि बढ्न सुझाव दिँदै आधारभूत आवश्यकता गाँस, बास र कपास सुनिश्चित गर्नुपर्ने बताए ।