निर्वाचनको परिणामबारे के भन्छ निजी क्षेत्र ?

काठमाडौं । नेपालको संसदीय इतिहासमै बिरलै पाइने जनादेश राष्ट्रिय स्वतन्त्र पार्टी (रास्वपा)ले पाएसँगै निजी क्षेत्र समेत उत्साहित देखिएको छ ।

पछिल्ला वर्षहरुमा कुनैपनि दलले चुनावमा एकल बहुमत नपाउँदा गठबन्धनको सरकार बन्ने र अनेकौँ स्वार्थले ती सरकार छोटो समयमै भंग हुँदा राजनीतिक अस्थीरताको मारमा निजी क्षेत्र पर्दै आएको थियो । हालै सुशीला कार्की नेतृत्वको अन्तरीम सरकारले गराएको चुनावमा दुई वर्ष अघि खुलेको रास्वपाले दुइ तिहाइ नजिकको बहुमत प्राप्त गर्ने निश्चित भएसँगै अब पाँच वर्षसम्म स्थिर सरकार बन्ने भएपछि निजी क्षेत्र निकै उत्साहित देखिएको छ । छिटो मतगणना सकेर अब पूर्ण कार्यकालको सरकार बनाउन लागिहाल्नुपर्ने र अब बन्ने दुई तिहाइ नजिकको रास्वपा सरकारसँग मिलर अघि बढ्न तयार रहेको निजी क्षेत्रका अगुवाहरुले बताउँछन् ।

नेपाल चेम्बर अफ कमर्सका अध्यक्ष कमलेश अग्रवालले अहिकोले अवस्थामा असम्भव जस्तै देखिने एउटै पार्टीले दुई तिहाइ नजिक बहुमत हासिल गर्नु सामान्य कुरा नभएको बताएका छन् । उनकाअनुसार निजी क्षेत्रले बारम्बार उठाउँदै आएको स्थायि सरकारको आफूहरुको माग पूरा हुन लागेको बताए । अग्रवालकाअनुसार अब बन्ने सरकारका अर्थनीतिहरुको स्थायित्व हुन जरुरी छ । संविधान जारी भएयता अर्थनिजी ढुलमुल भयो । जसले गर्दा निजी क्षेत्रले ठूलो क्षति बेहोर्नुपर्यो र विदेशी लगानीकर्ता पनि अलमलमा परे । अब त्यस्तो हुनु हुँदैन । अब आउने सरकारले करका नीतिहरु लगानी प्रवद्र्धन गर्ने खाले हुनुपर्नेमा उनको जोड छ ।

त्यसैगरी होटल एशोसिएशन नेपाल (हान)का अध्यक्ष विनायक शाहले अब बन्न लागेको दुई तिहाइको सरकारसँग सहकार्य गर्न आफूहरु आतुर रहेको बताए । उनकाअनुसार अब बन्न लागेको दुई तिहाइ नजिकको सरकारले आउँदा दिनमा सुशासन कायम गर्दै भ्रष्टाचार निर्मुल पार्नुपर्छ । जेनजीहरुको मागलाई पूर्ण रुपमा सम्बोधन गर्नुपर्छ । रास्वपाले आफ्नो घोषणापत्रमै पर्यटन र होटल क्षेत्रमा धेरै कुरालाई समेटेकाले ती कुराहरु अक्षरम्स लागू गर्न लाग्नुपर्ने उनको भनाइ छ । शाहकाअनुसार अबौँ लगानीमा बनाइएका पोखरा र भैरहवा एयरपोर्ट सञ्चालनमा ल्याएर धेरै पर्यटक भित्राउन सरकार चुकिरहेको छ । अब बन्ने सरकारले त्यसलाई पूर्ण रुपमा संचालन गर्न मास्टर प्लान बनाउनुपर्छ ।

बहुमत प्राप्त सरकारले पुराना कानूनहरुमा व्यापक रिफर्म गरेर मुलुकलाई अघि बढाउन जरुरी रहेको उनको भनाइ छ । शाहकाअनुसार अहिले भन्दा दोब्बर पर्यटक भित्र्याउन सकिने सम्भावना रहेकाले सरकारले सोही अनुसारको वातावरण बनाउनपर्नेमा उनको जोड छ ।