पार्टीपंक्तिलाई मनिष झाको अपिल : ‘आवश्यकता भन्दा बढी उत्साहित नहुनू’

काठमाडौं । राष्ट्रिय स्वतन्त्र पार्टी (रास्वपा) का प्रवक्ता मनिष झाले पार्टीका नेता, कार्यकर्तालाई आवश्यकता भन्दा बढी उत्साहित नहुन आह्वान  गरेका छन् । 

प्रतिनिधि सभा सदस्य निर्वाचनको मतपरिणाम रास्वपाको पक्षमा आइरहेका बेला प्रवक्ता झाले आवश्यकता भन्दा बढी उत्साहित नभई त्यसलाई देशको समस्या समाधान गर्ने जिम्मेवारीको रूपमा बुझेर अघि बढ्न सिंगो पार्टी पंक्तिलाई आह्वान  गरेका हुन् ।

धनुषा क्षेत्र नम्बर ३ बाट प्रतिनिधि सभा सदस्य पदमा भारी मतले निर्वाचित भए लगत्तै उनले सञ्चारकर्मीमाझ मतदाताले आफूहरूलाई विश्वास गरेकाले उनीहरूलाई निराश हुन नदिने गरी काम गर्ने प्रतिबद्धता व्यक्त गरे । 

प्रवक्ता झाले आफू र आफन्तका लागि नभई देशका लागि राजनीति गर्न आएकाले त्यसमा सुधार हुँदै जाने कुरामा शंका गरिरहनु नपर्ने जिकिर गरे । 

उनले भने,‘कुनै पनि सबै जनता जाग्ने गर्दछ । अनि परिवर्तन हुन्छ । त्यस्तै नेपालमा पनि त्यो अवस्था आयो । अब राष्ट्रिय स्वतन्त्र पार्टी, बालेन सरकार, रवि लामिछानेको नेतृत्वमा रहेको पार्टी, यो सबैले नै देशको समस्या समाधान गर्छ भनेर नै एक किसिमको विश्वास मतदातामा भयो । र त्यो ब्यालेटमार्फत बक्ससम्म पुग्यो । र, परिणामहरू हामीले देखिराखेका छौँ । मधेसको हकमा राष्ट्रिय स्वतन्त्र पार्टी पनि मधेसमा छ र भन्ने अवस्थाबाट मधेसको ३२ वटा नै सिट जितिन्छ कि भन्ने अवस्थासम्म पुगिसक्यो । तर यो थप जिम्मेवारी हो । मैले हिजो सामाजिक सञ्जालमा पनि लेखेको थिए–हामीलाई दिइएको जिम्मेवारी हो यो । त्यसैले कोही आवश्यकता भन्दा बढी उत्साहित नहुनु, अख्तियारी दुरुपयोग नगर्नुस् । किनकी हामी पहिलो आफूप्रति कठोर हुनुपर्दछ । नेता बन्न खोज्ने होइन, सहजकर्ता बन्ने हो । यसरी हामीले आगामी यात्राहरू सोच्नुपर्नेछ । किनकी हामी आफ्नो लागि राजनीति गर्न आएको होइन । आफन्त र परिवारको लागि राजनीति गर्न आएको होइन हामी । हामी त देशको लागि राजनीति गर्न आएको हो । हामीलाई पार्टी भन्दा पनि महत्त्वपूर्ण हाम्रो नागरिक छ । आफन्तभन्दा पनि विकासको खाकाहरू कोर्नु छ । जब प्राथमिकतामा यी कुराहरू पर्छ, तब सुधार भइहाल्छ । त्यसैले हामीलाई विश्वास गर्नुस्, हामी निराशा पार्दैनौँ ।’

प्रवक्ता झाले राष्ट्रिय स्वतन्त्र पार्टीले नेता नभई सहककर्ताको रूपमा जनताको सेवा गर्ने समेत  बताए ।