राष्ट्रिय विपद् जोखिम न्यूनीकरण तथा व्यवस्थापन प्राधिकरणकाअनुसार पछिल्लो २४ घण्टामा देशका विभिन्न स्थानमा कुल २८ वटा विपद्का घटनाहरू दर्ता भएका छन् र जसमा एक जनाको मृत्यु भएको छ भने १२ जना घाइते भएका छन् । प्राधिकरणकाअनुसार धादिङको त्रिपुरासुन्दरी गाउँपालिका–३ मा सत्य नारायणको पूजा भइरहेको अवस्थामा चट्याङ पर्दा एक १४ वर्षीया बालिकाको मृत्यु भएको छ । सोही घटनामा अन्य दुई जना घाइते भएका छन् । देशभरका विभिन्न विपद्बाट कुल १८ लाख ३३ हजार रुपैयाँ बराबरको अनुमानित आर्थिक क्षति भएको छ भने २५ वटा चौपायाको क्षति भएको छ ।
आगलागीका घटना र क्षति
गत २४ घण्टामा आगलागीका कारण उल्लेख्य क्षति पुगेको छ । पाँचथरको तुम्बेवा गाउँपालिका–२ मा विद्युत् सर्ट भई आगलागी हुँदा ५ लाख ५० हजार बराबरको क्षति भएको छ । कपिलवस्तुको चोरेखोलामा ग्यास लिक भएर २ लाख ५० हजार र दाङको तुलसीपुरमा १ लाख ८० हजार बराबरको क्षति भएको छ । मोरङ, सप्तरी, सिरहा, रौतहट, र लमजुङ लगायतका जिल्लामा पनि आगलागीका घटनाहरू भएका छन् । सिरहा र सर्लाहीमा आगलागीमा परी दुई जना घाइते भएका छन् ।
चट्याङ र प्राकृतिक प्रकोप
चट्याङका कारण इलाम, संखुवासभा, खोटाङ, र बागलुङमा मानवीय तथा पशुधनको क्षति भएको छ । इलाममा चट्याङका कारण ४ जना घाइते भएका छन् भने बागलुङमा एक १२ वर्षीय बालक बेहोस भएका छन् । यस्तै, संखुवासभा र खोटाङमा चट्याङका कारण चौपायाहरूको मृत्यु हुनुका साथै भौतिक संरचनामा क्षति पुगेको छ ।
जंगली जनावरको आक्रमण
मुस्ताङको लोमान्थाङमा हिउँचितुवाको आक्रमणबाट ९ वटा च्याङ्ग्रा मरेका छन् भने १० वटा घाइते भएका छन् । कैलालीमा बाघको आक्रमणबाट १० वटा बाख्राको क्षति भएको छ भने बारामा जंगली हात्तीले घरभित्रको अन्नपात नष्ट गरी ७७ हजार बराबरको क्षति पुर्याएको छ । सिन्धुपाल्चोकमा कुकुरको टोकाइबाट एक प्रहरी जवान घाइते भएका छन् ।
मौसम र तापक्रमको अवस्था
प्राधिकरणको रिपोर्टअनुसार पछिल्लो २४ घण्टामा संखुवासभाको नुम केन्द्रमा सबैभन्दा बढी ३७.४ मि.मि. वर्षा मापन गरिएको छ । तापक्रमको हकमा, झापाको दमकमा सबैभन्दा बढी ३२.५ डिग्री सेल्सियस र सोलुखुम्बुको लुक्लामा सबैभन्दा कम –०.५ डिग्री सेल्सियस तापक्रम रेकर्ड गरिएको छ ।
प्राधिकरणले विपद्का घटनाहरू न्यूनीकरण गर्न र थप क्षति हुन नदिन स्थानीय प्रशासन र सुरक्षा निकायहरू (नेपाल प्रहरी, सशस्त्र प्रहरी बल, र नेपाली सेना) सक्रिय रूपमा परिचालन भइरहेको जनाएको छ ।
ग्यास सिलिण्डर प्रयोगमा सावधानी अपनाउन, विद्युतीय तारहरूको मर्मत गर्न र चट्याङको समयमा सुरक्षित स्थानमा रहन प्राधिकरणले नागरिकहरूलाई आग्रह गरेको छ ।
विपद् सम्बन्धी थप जानकारीका लागि प्राधिकरणको आधिकारिक वेबसाइट र सामाजिक सञ्जालहरू नियमित फलो गर्न अनुरोध गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया