जनकपुरबाट अयोध्या सिधा उडान भर्ने तयारी, रामायण सर्किट जोड्न पहल गरिने

काठमाडौं । मधेश प्रदेशका मुख्यमन्त्री कृष्णप्रसाद यादवले जनकपुरधामलाई धार्मिक पर्यटकीय गन्तव्यका रूपमा विकास गर्न भारतको अयोध्यास्थित राम मन्दिरसँग सिधा हवाई उडानमार्फत जोड्ने पहल गरिएको बताएका छन् ।

मिथिला मध्यमा परिक्रमाको अवसरमा सञ्चारकर्मीहरुसँग कुरा गर्दै उनले यस्तो बताएका हुन् ।

उनले यस पहलले मधेश प्रदेशको पर्यटन प्रवर्द्धनमा नयाँ आयाम थप्ने विश्वास व्यक्त गरे ।

उनकाअनुसार प्रदेश सरकारले मधेस प्रदेशलाई रामायण सर्किटसँग जोड्दै जनकपुर र अयोध्याबीचको सम्बन्धलाई थप प्रगाढ बनाउने योजना अघि सारेको छ ।

सीता सर्किट र रामायण सर्किटलाई जोड्नसके जनकपुरको मात्र नभई सिंगो मधेश प्रदेशकै विकास हुने र यस क्षेत्रले अन्तर्राष्ट्रिय स्तरमा पर्यटकीय गन्तव्यको पहिचान बनाउने विश्वास व्यक्त गरे । यस योजनालाई मूर्त रूप दिन छिट्टै भारत भ्रमण गर्ने र त्यहाँका सम्बन्धित निकायहरूसँग समन्वय गरी कामलाई तिब्रता दिने बताए ।

उनले यस कार्यका लागि सकारात्मक आश्वासन प्राप्त भइसकेको र प्रक्रियालाई तत्काल अगाडि बढाइने जानकारी दिए ।

उनले भने, ‘अब आउने अर्को वर्षको लागि हामी सरकारको भुमिका निर्धारण गर्छौं र खासगरी यो प्रदेशलाई, यो जनकपुर स्थललाई राम सर्किटसँग जोड्ने हाम्रो प्रयास छ । रामायण सर्किटसँग, डाइरेक्ट अयोध्यासंग यता सीता सर्किट र रामायण सर्किटलाई जोडेपछि मलाई लाग्छ यो जनकपुर मात्र होइन मधेश प्रदेशको पनि विकास हुन्छ र मधेस प्रदेश पनि पर्यटकीय स्थलको रुपमा चिनिन्छ र त्यसैको उसमा मैले कुरा पनि अगाडि बढाएको छु । मलाई त्यो हिसावले त्यहाँबाट आश्वासन पनि आएको छ । म जान्छु इण्डिया जान्छु, इण्डिया गएर सम्बन्धित निकायहरूमा म सम्पर्क गर्छु र यो कामहरुलाई अगाडि तुरन्तै अगाडि बढाउँछु । त्यसै क्रममा यहाँ मैले अस्ति पनि कुरा गरेको एयरपोर्टमा, त्यो म संघ सरकारसँग पनि कुरा गर्छु वार्ता गर्छु र यो प्रदेशसँग पनि हुने सहयोग जस्तै यहाँ एयरपोर्टलाई यदि हामीले एक्सटेन्सन गर्‍यौँ भने प्रत्येक दिन ५०० भन्दा बढी पर्यटकहरु डाइरेक्ट यहाँबाट फ्लाईट अयोध्या जोड्यो भने प्रत्येक दिन ५०० भन्दा बढी दर्शनार्थीहरु यो सीता दर्शन गर्न आउँछ, त्यो हिसावको वातावरण म बनाउने प्रयास गर्छु । र त्यसै अन्तर्गत यो स्वच्छ सफा हराभरा जनकपुरको पनि अवधारणा म ल्याउँछु र जनकपुरलाई पनि स्वच्छ जनकपुरको रुपमा यो विश्वमा चिनियोस् भन्ने मेरो धारणा छ। म त्यो हिसाबले अगाडि बढ्छु ।’

जनकपुर विमानस्थलको स्तरोन्नति र विस्तारका लागि सङ्घीय सरकारसँग समेत समन्वय भइरहेको उनको भनाइ छ ।

विमानस्थल विस्तार गरी अयोध्याबाट सिधा उडान सञ्चालन गर्नसके दैनिक ५ सय भन्दा बढी भारतीय दर्शनार्थीहरू माता सीताको दर्शन गर्न आउने उनको विश्वास छ ।