ब्युटी प्याजेन्टमा बलात्कार आरोप लागेका मनोज पाण्डे पक्राउ

काठमाडौं । आठ वर्षअघि ब्युटी प्याजेन्टको नाममा किशोरीमाथि बलात्कार गरेको आरोप लागेका मनोज पाण्डे पक्राउ परेका छन् ।

शनिबार दिउँसो अपराध अनुसन्धान महाशाखाको टोलीले पाण्डेलाई स्वयम्भूबाट पक्राउ गरेको हो ।

घटना भएको लामो समय भए पनि एक युवतीले केही दिनदेखि सामाजिक सञ्जालमा आफूमाथि बलात्कार भएको खुलासा गरेकी थिइन् ।

घटनाबारे सामाजिक सञ्जाल, सडकदेखि सदनसम्म आवाज उठेपछि बिहीबार प्रहरीले अनुुसन्धान टोली गठन गरेको थियो ।

पक्राउ परेका पाण्डे ग्लोबल भिसाज कन्सन्टेन्सीका सञ्चालक हुन् । सन् २०१४ मा भएको मिस ग्लोबल इन्टरनेशनल नामक प्रतियोगिताको आयोजना भएको थियो । उक्त प्रतियोगिता जितेकी ती किशोरीलाई नयाँ बानेश्वरस्थित एभरेस्ट होटलमा सक्सेस पार्टीका लागि बोलाइएको पीडितले बताएकी छिन् ।

उनले सामाजिक सञ्जालमा बताए अनुसार पाण्डेले उनलाई जबरजस्ती करणी गरी फोटो तथा भिडियो बनाएका थिए । उनले गत बुधबार मात्रै सो कुरा बाहिर ल्याएपछि घटनाका विषयमा विभिन्न कोणबाट समीक्षा हुन थालेको हो ।