वर्षा शुरु भएसँगै नदी खोला छेउका स्थानीयबासी त्रसित

सप्तरी । वर्षा शुरु भएसँगै सप्तारीका स्थानीयबासीहरु त्रसित बनेका छन् । 

गत वर्ष आएको बाढीले जिल्लास्थित खाँडो, महुली, सप्तकोशी, खड्ग, त्रियुगासहित विभिन्न खोलामा आएको बाढी वस्तीमा प्रवेश गर्दा हजारौँ घर बगाएको थियो ।

गत वर्ष आएको बाढीले तहसनहस पारेको सम्झँदै जिल्लास्थित नदी, खोला आसपास घर बनाएर बसोबास गर्दै आएकाहरु पुनः बाढी आउन सक्ने भन्दै त्रसित बनेका हुन् ।

अर्काे वर्षाको मौसम आइसक्दा समेत नदी, खोलाको बाँध बाँध्ने काम सकिएको छैन् । बाँध बाँध्ने काम पनि विगतको जस्तै बालुवाको प्रयोग गरेर गरिरहेका छन्, ठेकेदारहरुले । 

स्थानीय भन्छन्, बालुवाको प्रयोग गरेर निर्माण भइरहेको बाँध लगातार दुई दिनसम्म पानी परे भत्किन सक्ने बताउँछन् ।

त्यस्तै सप्तरी प्रमुख जिल्ला अधिकारी सुरेन्द्र पौडेलका अनुसार बाढी आउने सम्भावनाप्रति आफूहरु सचेत रहेको बताउँछन् । वर्षा शुरु भएसँगै नदी खोला छेउका बासिन्दाहरु त्रसित छन्, उनले भने ।  
‘बाढी पूर्व योजनाहरु बनाउँदै क्लस्टरहरुले गर्नुपर्ने काम, प्रतिकार्य योजनाहरु तयार गरिसकेका छौं’, उनले भने, “सरोकारबालाहरुसँग निरन्तर सम्पर्कमा छौं । उनीहरुसँग सम्पर्क र समन्वय गरेर अघि बढ्नेछौं ।’ 

यो सन्दर्भलाई विचार गरेर भर्खंरै विपद् व्यवस्थापन समितिको बैठक बसी प्रतिकार्य योजनाहरु बनाइसकेको जानकारी दिए ।