इजरायलमा रहेका नेपालीलाई दूतावासले भन्यो– ‘सतर्क र सम्पर्कमा रहनुहोस्’

काठमाडौं । इजरायलस्थित नेपाली दूतावासले त्यहाँ रहेका नेपाली नागरिकलाई सतर्क र सुरक्षित रूपमा बस्न आग्रह गरेको छ ।

मध्यपूर्वमा बढ्दो तनाव र युद्धको अवस्थालाई ध्यानमा राख्दै दूतावासले एक विज्ञप्ति जारी गर्दै यस्तो अनुरोध गरेको हो ।

दूतावासले अनावश्यक रूपमा बाहिर ननिस्कन, आफू बसेको स्थानमै सुरक्षित रहन र संयमता अपनाउन आग्रह गरेको छ । साथै, इजरायल सरकारका आधिकारिक सूचना र निर्देशनहरू पालना गर्न पनि आग्रह गरेका छ ।

यस्तै, पछिल्ला घटनाबारे नियमित जानकारी राख्न र सामाजिक सञ्जालमा युद्धसम्बन्धी भिडियोहरू अनावश्यक रूपमा शेयर नगर्न पनि अनुरोध गरिएको छ ।

दूतावासले राहदानी, परिचयपत्र, लाइसेन्स र बैंक कार्डजस्ता आवश्यक कागजात सधैँ साथमा राख्न पनि सबैलाई आग्रह गरेको छ ।