कृषि मलको आवश्यक व्यवस्था मिलाइयोस् : खुश्बु ओली

काठमाडौं । राष्ट्रिय प्रजातन्त्र पार्टीकी सांसद खुश्बु ओलीले कृषि मलको आवश्यक व्यवस्था मिलाउन सरकारसँग माग  गरेकी छन् । 

मंगलबार प्रतिनिधि सभा बैठकमा बोल्दै उनले खेतीवाली लगाउने समय आएको उल्लेख गर्दै कृषि मलको व्यवस्थामा सरकारले कस्तो रणनीति अपनाएको छ ? भनी प्रश्न समेत  गरिन् ।

पश्चिम एशियाको द्वन्द्वका कारण मलको मूल्य वृद्धि र आपूर्ति संकटका संकेतहरु देखा परिसकेकाले सरकारको त्यसको व्यवस्थापनमा समयमा नै ध्यान दिन आवश्यक रहेको सांसद ओलीको भनाई थियो ।

उनले किसानले समयमा मल नपाए त्यसको मार मुलुकको अर्थतन्त्रमा समेत पर्ने भएकाले सरकारले त्यसको बारेमा आवश्यक निर्णय लिन ढिलाइ गर्न नहुने बताइन् । 

सांसद ओलीले भनिन्,‘रोपाइँको सिजन आउँदैछ । यस अघि मल र कृषि सामग्री सुनिश्चित गर्नु अति आवश्यक छ । तर पश्चिम एसियाको द्वन्द्वका कारण मलको मूल्य वृद्धि र आपूर्ति संकटका संकेतहरु देखापरिसकेको छन् । यस विषयलाई लिएर सरकारको तयारी के छ ? म सम्माननीय सभामुखमार्फत सोध्न चाहन्छु । रोपाइँको मुखमा मलको अभाव भएमा किसानहरू पीडित हुन्छन् । हाम्रो उत्पादन घटछ । खाद्य सुरक्षा जोखिममा पर्छ । र, अर्थतन्त्रमा समेत गम्भीर असर पर्दछ । त्यसैले वैकल्पिक आपूर्ति स्रोत खोज्ने र आपूर्ति विविधीकरण गर्ने र कृषि मलको सप्लाईमा सरकारको रणनीति के छ ? यसको व्यवस्था गरोस् भनेर म सरकारसमक्ष ध्यानाकर्षण गराउन चाहन्छु । सो समस्याको समाधान कृषि र परराष्ट्र मन्त्रालयले मिलेर समाधान गरोस् ।’

सांसद ओलीले कृषि मलको सहज आपूर्तिका लागि सरकारले गरिरहेको तयारीबारे पनि जानकारी दिन आवश्यक रहेको बताइन् ।