काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले मनसुन सुरु हुनुअघि कुमारी वहाल (कुमारी घर)को छानो जिर्णोद्धार गरिसक्न निर्देशन दिएकी छन् ।
बिहीबार वसन्तपुरस्थित कुमारी घरको छानो जीर्णोद्धार कार्यको अनुगमन गर्दै उनले यस्तो निर्देशन दिएकी हुन् ।
उनले कुमारी घरसँग सम्बन्धित धार्मिक, सांस्कृतिक तथा सामाजिक पक्षमा असर नहुने गरी समयमा काम सक्न निर्माण पक्षलाई निर्देशन दिएको बताइन् ।
उनले कुमारी वहाल काठमाडौंको अनुहार समेत भएको उल्लेख गर्दै यसको छानो चुहिएको सूचना पाएपछि चासो राखेर महानगरपालिका जीर्णोद्धारका लागि आएको बताइन् ।
गत बर्खायामबाट कुमारी घरको छानो चुहिने भएपछि जीर्णोद्धारको प्राविधिक पक्ष अध्ययन गर्न साउन २ गते समिति गठन भएको थियो । कार्यवाहक प्रमुख डंगोलले जीर्णोद्धार कार्य सम्पन्न भइसकेपछि थप सामाजिक तथा धार्मिक कार्य अगाडि बढाइने जानकारी समेत बताइन् ।
उनले भनिन्, ‘आज हामीले जसले यो कन्ट्र्याक्टमा काम गर्दै हुनुहुन्छ उहाँसँग बसेर जतिसक्दो छिटो अझ मनसुन आउनुभन्दा अगाडि कसरी सम्पन्न गर्न सकिन्छ भनेर छलफलको लागि पनि आज आएका हौँ । महानगरबाट गर्नुपर्ने सहयोगमा कुनै पनि कसुर बाँकी नराख्ने तथा यो सांस्कृतिक तथा धार्मिक रूपले पनि एकदमै महत्त्वपूर्ण ठाउँ भएको कारण यसमा धार्मिक तथा प्रशासनिक रूपमा पनि हामी काम अगाडि बढाउने छौँ ।’
बोलपत्रमार्फत छानिएको निर्माण पक्ष अजय निर्माण सेवासँग फागुन ११ गते सम्झौता गरेर फागुन २५ गतेदेखि जिर्णोद्धारको काम सुरु भएको थियो । कार्यवाहक प्रमुख डंगोलले न्यूरोडस्थित महानगरको वरुणयन्त्र कार्यालयको पनि अनुगमन गरेकी छन् । कार्यालयको पुनर्निर्माण समयमै सम्पन्न गर्न उहाँले निर्माण पक्षलाई निर्देशन दिइन् ।
यो खबर पढेर तपाईलाई कस्तो महसुस भयो ?
प्रतिक्रिया