तनहुँ । अर्थशास्त्री तथा नीतिगत विज्ञ डा.स्वर्णिम वाग्ले तनहुँ क्षेत्र नं.१ बाट दोस्रो कार्यकालका लागि प्रतिनिधिसभा सदस्यमा निर्वाचित भएका छन् ।
निर्वाचनमा उनले ३८ हजार ४० मत प्राप्त गर्दै विजयी भएका हुन् । यसअघि सम्पन्न उपनिर्वाचनमा पनि उनी यही क्षेत्रबाट ३४ हजार ९११ मतसहित निर्वाचित भएका थिए ।
गोरखा जिल्लामा जन्मिएका वाग्ले सामान्य पारिवारिक परिवेशमा हुर्किएका हुन् । बाल्यकालदेखि नै अध्ययनमा रुचि राख्ने उनी उच्च शिक्षाका लागि विदेश पुगेका थिए । अर्थशास्त्रमा गहिरो अध्ययन गर्दै उनले ‘पिएचडी’ उपाधि हासिल गरेका हुन् ।
अध्ययनका क्रममा उनले विकास अर्थशास्त्र, सार्वजनिक नीति तथा आर्थिक सुधारका विषयमा विशेष अनुसन्धान गरेका थिए । यही अनुभवका कारण उनी अन्तरराष्ट्रिय स्तरका नीतिगत बहसमा समेत सहभागी भएका थिए ।
उच्च शिक्षापछि उनले विभिन्न अन्तरराष्ट्रिय संस्थामा काम गरेका थिए। विशेषगरी संयुक्त राष्ट्रसङ्घसँग आबद्ध कार्यक्रममार्फत उनले विकास, गरिबी न्यूनीकरण र आर्थिक नीतिका विषयमा काम गरेका थिए ।
स्वदेश फर्किएपछि उनले राष्ट्रिय योजना आयोगको उपाध्यक्षको जिम्मेवारी सम्हाले। उक्त जिम्मेवारीमा रहँदा उनले देशको दीर्घकालीन विकास योजना, आर्थिक नीति सुधार तथा सुशासनका विषयमा काम गरेका थिए ।
लामो समय नीतिगत क्षेत्रमा काम गरेपछि उनले नीति निर्माणसँगै त्यसको कार्यान्वयनका लागि राजनीतिक नेतृत्व आवश्यक रहेको महसुस गर्दै सक्रिय राजनीतिमा प्रवेश गरेका थिए। उनी राष्ट्रिय स्वतन्त्र पार्टी (रास्वपा) मार्फत राजनीतिमा आएका हुन् ।
तनहुँ–१ बाट निर्वाचन लड्दा उनले विकास, सुशासन, रोजगारी सिर्जना तथा आर्थिक सुधारलाई प्रमुख एजेन्डा बनाएका थिए । मतदातासँग प्रत्यक्ष संवाद गर्दै उनले नयाँ सोच र परिणाममुखी राजनीतिका विषय उठाएका थिए ।
डा। वाग्ले अहिले नेपाली राजनीतिमा नीतिगत क्षमता र आर्थिक विषयको ज्ञान भएका नेताका रूपमा चिनिन्छन् । अर्थतन्त्र र विकास नीतिमा उनको अनुभवले संसद्मा नयाँ दृष्टिकोण थप्ने अपेक्षा गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया