रोल्पाबाट प्रचण्डको उद्घोष : ‘हतियार होइन, मतपत्रको तागत लिएर सिंहदरबार छिर्नेछौँ’

काठमाडौं । नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले देशको राष्ट्रिय स्वाधीनता र आत्मसम्मानमाथि गम्भीर चुनौती थपिएको बताएका छन् । रोल्पामा आयोजित चुनावी सभालाई सम्बोधन गर्दै उनले विदेशी प्रतिक्रियावादी र तिनका दलालहरूका विरुद्ध नयाँ एकता र शक्तिका साथ प्रतिवाद गर्नुपर्ने आवश्यकता औँल्याए । प्रचण्डले रोल्पालाई नेपाली जनवादी क्रान्तिको किल्ला र ‘क्रान्तिको राजधानी’ को रूपमा चित्रण गरेका छन् ।

उनले भने, ‘रोल्पामा उभिएर सम्बोधन गर्दा मैले देशभरिका ७७ वटै जिल्लाका जनतालाई सम्बोधन गरेको महशुस गरेको छु । यहाँका सहिद, बेपत्ता योद्धा र क्रान्तिकारी जनताको त्यागले नै १० वर्षे जनयुद्ध सफल भएको हो ।’ आफू पहिलो पटक रोल्पाबाटै निर्वाचित भएर प्रधानमन्त्री बनेको स्मरण गर्दै उनले रोल्पाका जनताप्रति आफू सधैँ ऋणी रहेको बताए । उनले भने, ‘रोल्पाका जनताले इतिहास बनाउनुभयो र तपाईहरुकै काखमा बसेर नै हामीले नेपालको जनवादी क्रान्तिलाई आधारभुत रूपले सफल पार्न सम्भव भयो ।’

राष्ट्रिय संकट र विदेशी हस्तक्षेपको चुनौती
वर्तमान राजनीतिक परिस्थितिलाई ‘असहज’ र ‘जटिल’ भन्दै प्रचण्डले राष्ट्र निकै ठूलो अप्ठ्यारोमा परेको उल्लेख गरे । जेनजी युवाहरूको आन्दोलन र त्यसपछि भएका घटनाक्रमले निर्वाचनको वातावरण असहज बनाएको उनको तर्क छ । ‘नेपाली जनताले आफ्नो बारेमा निर्णय गर्ने अधिकारमाथि विदेशी शक्ति र तिनका दलालहरूले चुनौती दिने दुःशाहस गरेका छन् ।’ उनले भने ‘आज संघीय लोकतान्त्रिक गणतन्त्रको संविधान र प्राप्त उपलब्धिहरूमाथि प्रहार भइरहेको छ । महान सहिदहरुले अकल्पनीय त्याग र बलिदानबाट स्थापित गरेका मूल्य मान्यतामाथि प्रहार हुने दुःशाहस भएको छ ।’

रुकुम पूर्वबाट उम्मेदवारीको रहस्य
यसपटक रुकुम पूर्वबाट प्रत्यक्ष निर्वाचन लड्नुको पछाडि राष्ट्र बचाउने नयाँ अभियानको उद्देश्य रहेको उनले प्रष्ट पारे ।
उनले भने, ‘म रुकुममा मात्र उम्मेदवार भएको होइन, यो रोल्पा, सल्यान र जाजरकोटसहितको केन्द्रिय आधार इलाकाको प्रतिनिधित्व हो । यहाँबाट शुरु हुने अभियानले देशभरि सुशासन, भ्रष्टाचार नियन्त्रण र आर्थिक समृद्धिको नयाँ सन्देश दिनेछ ।’
उनले विगतमा निरंकुश राजतन्त्रका विरुद्ध युद्धको उद्घोष गर्दा पनि रोल्पा–रुकुमबाटै सुुरु गरिएको स्मरण गर्दै आजको संकट समाधान गर्न पनि यही आधार इलाकाको साथ आवश्यक रहेको बताए ।

समाजवादतर्फको नयाँ यात्रा र अपील
प्रचण्डले सुशासन, सामाजिक न्याय र समृद्धिको नयाँ यात्रामार्फत समाजवादतर्फ अगाडि बढ्न सबैलाई अपील गरे । विदेशी हस्तक्षेपको प्रतिवाद गर्न नेपाली जनता नयाँ एकताका साथ तयार रहेको सन्देश विश्वभर पुर्‍याउनु पर्नेमा उनले जोड दिए ।
‘प्रतिक्रियावादीहरूले हाम्रो आत्मसम्मानमा प्रहार गरे भने हामी नयाँ शक्तिका साथ उठ्नेछौं ।,‘उनले भने ‘विश्वभर रहेका नेपालीहरुलाई पनि फेरि एकचोटि नयाँ एकताका साथ नयाँ संकल्प र आत्मविश्वासका साथ अभियान छेड्नका लागि हामी यहाँ छौँ,‘ उनले भने । राष्ट्रलाई संकटबाट मुक्त गर्न आगामी निर्वाचनलाई एउटा महाअभियानको रूपमा सफल पार्न अपील गरे । उनले शहीदहरूको बलिदानबाट प्राप्त उपलब्धिहरूको रक्षा गर्दै समाजवादको नयाँ यात्रा आरम्भ गर्ने संकल्प व्यक्त गरे ।

अधिकारको रक्षा र शासकीय स्वरूपमा सुधार
दाहालले जनयुद्ध र जनआन्दोलनमार्फत महिला, दलित र उत्पीडित समुदायले प्राप्त गरेका अधिकारहरूलाई अझ परिमार्जित र विकसित गर्नुपर्नेमा जोड दिए । उनले भने, ‘हामीले शुरुदेखि नै प्रत्यक्ष निर्वाचित कार्यकारी राष्ट्रपतिको कुरा गर्दै आएका छौं । त्यो अझै पूरा भएको छैन । हामीले निर्वाचन प्रणाली यस्तो खर्चिलो र महङ्गो खोजेकै होइन । पूर्ण समानुपातिक निर्वाचन प्रणालीमार्फत आम नेपाली जनताको अभिमतलाई सम्मान गर्न बाँकी छ ।’

स्वच्छ निर्वाचन र राष्ट्रिय एकताको आवश्यकता
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्नुपर्ने बताउँदै दाहालले सुरक्षा निकाय, राजनीतिक दल र कर्मचारीतन्त्रलाई राष्ट्र बचाउने कामलाई उच्च प्राथमिकता दिन आग्रह गरे । उनले हालैका केही घटनाक्रमले जनतालाई चिन्तित बनाएको उल्लेख गर्दै निर्वाचन नै निकासको उत्तम विकल्प भएको दाबी गरे । उनले भने, ‘हाम्रो सुरक्षा निकाय प्रति भरोसा छ । सेना र प्रहरी प्रति भरोसा छ । राष्ट्र बचाउने संकल्प गरौं र यो निर्वाचनलाई स्वच्छ निष्पक्ष र भयरहित वातावरणमा सम्पन्न गरौं ।’
‘हामी यसपटक हतियार होइन, मतपत्रको तागत लिएर सिंहदरबार छिर्नेछौं र नयाँ समाजवादी अभियान चलाउनेछौँ ।’

भ्रष्टाचार विरुद्धको लडाइँ र नयाँ कम्युनिष्ट एकता
आफ्नो नेतृत्वको सरकारले भ्रष्टाचार विरुद्ध र सामाजिक न्यायका पक्षमा अभियान छेडेको तर दलाल र बिचौलियाहरूले त्यसलाई सहन नसकी सरकारबाट हटाएको उनको आरोप छ । दाहालले भने, ‘अहिले दुई दर्जनभन्दा बढी देशभक्त र क्रान्तिकारी कम्युनिष्टहरू मिलेर ‘नेपाली कम्युनिष्ट पार्टी’ बनाएका छौं । यो नयाँ तागतले प्रतिक्रियावाद र भ्रष्ट शासनलाई भत्काउनेछ ।’

रोल्पाबाट समाजवादको नयाँ संकल्प
रोल्पा र रुकुमलाई क्रान्तिको आधार इलाका मान्दै दाहालले यहाँबाटै समाजवादी नेपाल निर्माणको संकल्प दोहोर्‍याए ।
उनले रोल्पाका उम्मेदवार वर्षमान पुनलाई अत्यधिक बहुमतले विजयी गराउन अपील गर्दै भने, ‘वर्षमानलाई के गर्न पर्छ मेरो जिम्मा छोडदिए हुन्छ । उनले यो राष्ट्रको निम्ति यहाँको जनताको निम्ति यहाँ समाजवादको नयाँ यात्रा आरम्भ गर्नको निम्ति धेरै जिम्मेवार भएर काम गर्नुहुनेछ ।’

दाहालले आफ्नो पार्टी आगामी निर्वाचनमा पहिलो शक्ति बन्ने सम्भावना रहेको दाबी गर्दै देशभरका क्रान्तिकारी र जनतालाई एकजुट हुन आह्वान गरे । उनले जीवनको उत्तरार्धमा एकचोटी फेरि नयाँ अभियानका लागि जनताबाट शक्ति प्राप्त गर्न देशव्यापी अभियानमा रहेको बताए ।