बालेनको भनाइ रविले सच्याए– ‘निर्माण व्यवसायीलाई डोरीले होइन कानुनले बाँध्ने भनेका हौँ’

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले निर्माण व्यवसायीहरुलाई विज्ञप्ति निकालेर प्रतिक्रिया जनाउनुभन्दा विकास निर्माणका काममा केन्द्रित हुन आग्रह गरेका छन् ।

मंगलबार ईटहरीमा आयोजित पार्टीको कार्यक्रमलाई सम्बोधन गर्दै पार्टीले आफ्ना धारणा सार्वजनिक गर्दा केही पक्ष आत्तिएको टिप्पणी गर्दै अब देश विकास निर्माणको बाटोमा अघि बढिसकेको दाबी गरे ।

उनले निर्माण व्यवसायीहरुलाई दुई–तीन सिफ्टमा, रातदिन काम गर्नेगरी तयारी गर्न आग्रह गर्दै आवश्यक उपकरण पर्याप्त नभए नयाँ उपकरण खरिदको तयारी गर्न सुझाव दिए ।

सभापति लामिछानेले अब कानूनअनुसार काम हुने स्पष्ट पार्दै कसैलाई ‘डोरीले बाँध्ने’ नभई कानूनले नै बाँधेर काम गराइने दाबी गरे ।

रास्वपाका वरिष्ठ नेता बालेन्द्र शाह ‘बालेन’ ले समयमा काम नसक्ने निर्माण व्यवसायीलाई रुखमा बाँधेर काममा लगाउने अभिव्यक्ति दिएका थिए । बालेनको उक्त अभिव्यक्ति विरुद्ध नेपाल निर्माण व्यवसायी महासंघले आपत्ति जनाएपछि सभापति लामिछानेले प्रष्टीकरण दिएका हुन् ।

उनले अब देश विकास निर्माणको बाटोमा अघि बढ्ने भएकोले सुरक्षाको चिन्ता नगरी उपकरण खरिदमा लाग्न निर्माण व्यवसायीलाई आग्रह गरे ।

उनले भने, ‘रास्वपाले आफ्ना कुरा राख्दै गर्दा कतिपय मानिसहरु आत्तिएको देखिएको छ । म निर्माण व्यवसायीलाई विज्ञेप्ती निकाल्न पर्दैन, ठूलाठूला इक्युपमेन्ट कसरी खरिद गर्ने हो, रातारात विकास कसरी गर्ने हो त्यतातिर लाग्नुस्, विज्ञप्ति निकाल्न पर्दैन भन्न चाहन्छु । अब देश विकास निर्माणको बाटोमा अगाडी बढ्दैछ । बाँध्ने भनेको कानुनले भनेको हो, मान्छेलाई डोरीले बाँध्ने भनेको होइन । कानुनले बाँधेर काम गराउने भनेको हो, कानुनले नै बाँध्ने हो,’ लामिछानेले भने ।

यता लामिछानेले कांग्रेस सभापति गगनकुमार थापालाई २० वर्षसम्म सांसद मन्त्री भएपछि बल्ल बाटो बनाउन कानुन फेर्नुपर्ने थाहा भयो ? भन्दै प्रश्न समेत गरेका छन् । गगनले बालेनको उक्त अभिव्यक्तिप्रति कटाक्ष गर्दै बाटो निर्माणका लागि निर्माण व्यवसायीलाई डोरीले बाँध्ने नभई कानुन बनाउनुपर्नेमा जोड दिएका थिए ।

‘२० वर्ष सांसद मन्त्री भएपछि बल्ल बाटो बनाउन कानून फेर्नुपर्छ भन्ने ज्ञान आयो तपाईहरुलाई, तपाईहरुको ज्ञान तपाईसंगै राख्नुहोला । म सबै निर्माण व्यवसायी भन्न चाहन्छु । दुई/तीन सिफ्टमा काम हुन्छ । रातरात काम हुन्छ । तपाईसंग भएका उपकरणहरु पर्याप्त छैनन् होला, विज्ञप्ति निकाल्न पर्दैन के के उपकरण ल्याउने हो, कसरी ल्याउने हो, त्यसको तयारी गर्नुस् । अब नेपाल विकास निर्माणको बाटोमा जान्छ, कसैले थेग्न सक्दैन ।’