काठमाडौं । अमेरिकी राष्ट्रपति डोनाल्ड ट्रम्पले विश्वव्यापी ट्यारिफ १० प्रतिशतबाट बढाएर १५ प्रतिशत पुर्याउने घोषणा गरेका छन् ।
ट्रम्पले शनिबार सामाजिक सञ्जालमा पोस्ट गर्दै नयाँ विश्वव्यापी ट्यारिफलाई १५ प्रतिशत पुर्याउने घोषणा गरेका हुन् ।
यो घोषणा सर्वोच्च अदालतको फैसलाको एक दिनपछि आएको हो । जसले उनको पुरानो ट्यारिफ नीतिलाई अवैध ठहर गरेको थियो ।
उनले धेरै देशहरूले दशकौंदेखि अमेरिकालाई ‘ठगिरहेको’ आरोप लगाउँदै यो कदम चालेको बताए । यसअघि शुक्रबार सर्वोच्च अदालतले ६–३ मतले ट्रम्पको अन्तर्राष्ट्रिय आपतकालीन आर्थिक शक्ति ऐन अन्तर्गत लगाइएको ट्यारिफ अवैध ठहर गरेको थियो ।
अदालतको फैसलापछि ट्रम्पले तुरुन्तै १० प्रतिशत विश्वव्यापी आयात शुल्क लगाउने आदेशमा हस्ताक्षर गरेका थिए । अब उनले यो दरलाई १९७४ को व्यापार ऐनको धारा १२२ अन्तर्गत अधिकतम अनुमति प्राप्त १५ प्रतिशत पुर्याएका छन् । यो ट्यारिफ अस्थायी रूपमा १५० दिनसम्म लागू हुन सक्छ ।
जबसम्म कंग्रेसले विस्तार गर्दैन । ट्रम्पले आगामी केही महिनामा थप नयाँ र कानुनी रूपमा अनुमति प्राप्त ट्यारिफहरू निर्धारण गर्ने बताएका छन् । उनले यो कदम ‘अमेरिकालाई महान् बनाउने’ अभियानको हिस्सा भएको र यसलाई अझ बढी सफल बनाउने उल्लेख गरे । यो घटनाले विश्व व्यापारमा नयाँ अनिश्चितता थपेको छ । विशेष गरी अमेरिकाका मुख्य व्यापार साझेदारहरू जस्तै क्यानडा, मेक्सिको, चीन, युरोपेली संघ र बेलायतमा प्रभाव पार्न सक्छ ।
यो खबर पढेर तपाईलाई कस्तो महसुस भयो ?
प्रतिक्रिया