निर्वाचनमा महिला उम्मेदवारको संवेदनशीलता ख्याल गर्न माग

काठमाडौं । नेपाली कम्युनिष्ट पार्टी (नेकपा) बाट राष्ट्रिय सभाकी सांसद रेणु चन्दले आसन्न निर्वाचनमा महिला उम्मेदवारहरुलाई विजयी बनाउने काममा जोड दिन राजनीतिक दलहरुलाई आग्रह गरेकी छन् ।

सोमबार काठमाडौंमा आयोजित निर्वाचन प्रक्रियामा महिलाको सहभागिता प्रवन्धका लागि सम्वाद कार्यक्रममा बोल्दै उनले सो आवश्यता औँल्याएकी हुन् ।

निर्वाचनमा राजनीतिक दलहरुले भाग लिने भएकाले उनीहरुले पुरुष उम्मेदवारहरुलाई जसरी नै महिला उम्मेदवारहरुलाई पनि विजयी गराउन लाग्नुपर्ने सांसद चन्दको तर्क छ ।

उनले महिला उम्मेदवारहरु उठेको निर्वाचन क्षेत्रमा संवेदनशील भएर काम गर्न निर्वाचन आयोगलाई पनि सचेत गराइन् । महिला उम्मेदवारहरुमाथि सामाजिक सञ्जालमार्फत आक्रमण हुने भएकाले निर्वाचन आयोगले त्यसमा निगरानी राख्नुपर्ने सांसद चन्दले बताइन् ।

उनले भनिन्, ‘महिला उम्मेदवारहरुलाई जिताउने जिम्मेवारी पनि राजनीतिक पार्टीहरुको हो । उनीहरुले त्यही अनुसार काम गर्नुपर्ने हुन्छ । महिला उम्मेदवारहरु उठेका क्षेत्रलाई निर्वाचन आयोगले अलि समवेदनशील तरिकाले हेरियोस । खासगरी सोसल मिडियाबाट उनीहरुलाई कमजोर बनाउने जुन काम भइरहेको छ । त्यसमा निर्वाचन आयोगले समवेदनशील भएर काम गरोस् भन्ने हाम्रो आग्रह छ ।’

सांसद चन्दले राजनीतिक दलहरुले नीति निर्माणको तहमा महिलाहरुको सहभागिता गराउने कुरामा पनि विशेष ध्यान दिन आवश्यक रहेको बताइन् ।