काठमाडौं । अमेरिकी राष्ट्रपति डोनाल्ड ट्रम्पले युद्धबाट ध्वस्त भएको गाजाको पुनर्निर्माणका लागि पाँच अर्ब अमेरिकी डलर सहयोग दिने घोषणा गरेका छन् । साथै उनले गाजामा अन्तर्राष्ट्रिय बलका रूपमा हजारौँ सुरक्षाकर्मी पठाइने प्रतिबद्धता पनि व्यक्त गरेका छन् ।
ट्रम्पका अनुसार यी प्रतिबद्धताहरूको औपचारिक घोषणा बिहीबार वासिंगटन मा बस्ने शान्ति बोर्डको पहिलो बैठकबाट गरिनेछ । उनले सामाजिक सञ्जालमार्फत सन्देश जारी गर्दै शान्ति बोर्ड इतिहासकै सबैभन्दा प्रभावशाली अन्तर्राष्ट्रिय निकाय बन्ने दाबी गरेका छन् । ‘यसको अध्यक्षता गर्न पाउनु मेरा लागि सम्मानको कुरा हो,‘उनले भनेका छन् ।
यद्यपि, पुनर्निर्माणमा कुन–कुन देशले कति रकम दिने वा सुरक्षा बलका लागि सैनिक पठाउने भन्नेबारे ट्रम्पले विस्तृत जानकारी दिएका छैनन् । यसैबीच, इन्डोनेसियाले गाजामा मानवीय तथा शान्ति मिसनका लागि करिब आठ हजार सैनिक जुन अन्त्यसम्ममा तयारी अवस्थामा राख्न सक्ने जनाएको छ ।
प्यालेस्टिनी क्षेत्रको पुनर्निर्माण अत्यन्त चुनौतीपूर्ण हुने देखिएको छ । संयुक्त राष्ट्र संघ, विश्व बैंक र युरोपेली संघ को संयुक्त अनुमानअनुसार गाजाको पुनर्निर्माणमा करिब ७० अर्ब अमेरिकी डलर खर्च लाग्नेछ । दुई वर्षभन्दा लामो समयदेखि जारी इजरायली बमबारीका कारण गाजा पट्टीका अधिकांश क्षेत्र असुरक्षित बनेका छन् ।
युद्धविराम सम्झौतामा एक सशस्त्र अन्तर्राष्ट्रिय बल तैनाथ गर्ने व्यवस्था गरिएको छ, जसले सुरक्षा कायम राख्ने र उग्रवादी समूह हमास लाई निशस्त्रीकरण गर्ने बताइएको छ । यो इजरायलको प्रमुख माग भए पनि हालसम्म सीमित देशहरूले मात्र उक्त बलमा सहभागी हुने इच्छा देखाएका छन् ।
गत १० अक्टोबरमा अमेरिकाको मध्यस्थतामा भएको युद्धविराम सम्झौता इजरायल र हमासबीचको दुई वर्ष लामो युद्ध रोक्ने प्रयासका रूपमा लिइएको थियो । युद्धको तीव्रतामा केही कमी आए पनि इजरायली सेनाले बेला–बेलामा हवाई आक्रमण जारी राखेको र सैन्य नियन्त्रणमा रहेका क्षेत्र नजिक प्यालेस्टिनीमाथि गोलाबारी भइरहेको जनाइएको छ ।
बिहीबार हुने शान्ति बोर्डको पहिलो बैठकमा २० भन्दा बढी सदस्यमध्ये कति सहभागी हुनेछन् भन्ने अझै स्पष्ट छैन । इजरायली प्रधानमन्त्री बेन्जामिन नेतन्याहू को सहभागिता भने न्यून सम्भावनामा रहेको बताइएको छ ।
यो खबर पढेर तपाईलाई कस्तो महसुस भयो ?
प्रतिक्रिया